کراچی۔ 31 دسمبر (اے پی پی) صدر مملکت ڈاکٹر عارف علوی پارینے کہ ملک انا راجی و اقتصادی شونداری آب اٹنگا تعلیم تون براہ راست گنڈوک ءِ، تعلیمی ادارہ غاتے جہانی آب انارداٹ آب اٹ تعلیم نا فراوانی کن ہروڑاٹ کوشست آتے بایدے کاریم اٹ اتوئی مرے۔ اوداہیت ءِ وفاقی اردو یونیورسٹی آف آرٹس، سائنس و ٹیکنالوجی نا سینٹ نا 38 می دیوان نا کماشی ءِ کرسا پارے، ہرادوشنبے نادے آ داڑے اڈ ہلک۔ صدر مملکت ءِ یونیورسٹی نا کنڈآن چست کروک آ گام گیج و مون تروک ویل آتا بارواٹ سرجم احوال تننگا۔ صدر مملکت دا ہیت آ زور شاغا کہ ملک انا راجی و اقتصادی شونداری حکومت نا اولیت ءِ ۔ اوپارے کہ آب اٹ تعلیم و انسانی وسیلہ غاتا شونداری دارداٹ بھاز زیات اہمیت تخک۔ اوداہیت آ ہم زور شاغا کہ جامعہ غاتے ورناتے داوڑاٹ بایدے تیار کروئی مرے کہ او پوسکن آ دور انا چیلنج آتون جوان وڑاٹ مون تننگ کیر و لمہ وطن نا شونداری و شونہالی ٹی تینا تعمیری کڑد ءِ ادا کننگ کیر۔
