اسلام آباد۔ 31 دسمبر (اے پی پی) اینخو مالی سال انا بنائی پنچ تُو اٹی ملک اٹی تیل و گیس انا بشخ اٹی 72.5 ملین ڈالر نا براہ راست درملکی زرکاری ریکارڈ کننگانے اوکان پد گدرینگوک آ 10 سال اٹی ملک اٹی تیل و گیس انا بشخ اٹی براہ راست درملکی زرکاری نا کچ 3ہزار 904ٹک 2ملین ڈالر اسکان سرمس۔ زرکاری بورڈ انا رداٹ اینخو مالی سال انا بنائی پنچ تُو اٹی ملک اٹی تیل و گیس انا بشخ اٹی 72.5ملین ڈالر نا براہ راست درملکی زرکاری مس۔ پاکستان اٹی تیل و گیس انا بشخ ہموبشخ آتے ٹی اوار مریک ہراڑے براہ راست پیشن نا زرکاری نا گمان آک زیات ءُ۔ حساب وکتاب نا رداٹ مالی سال 2009-10ء ٹی تیل و گیس انا بشخ اٹی 740.6ملین ڈالر نا براہ راست پیشن نا زرکاری ریکارڈ کننگا۔ مالی سال 2010-11 ء ٹی تیل و گیس انا بشخ اٹی براہ راست پیشن نا زرکاری نا کچ 512.2ملین ڈالر ئس۔ مالی سال 2011-12ء ٹی دا بشخ اٹی براہ راست پیشن نا زرکاری نا کچ 629.4ملین ڈالر ریکارڈ کننگا۔ ہندا وڑ مالی سال 2012-13ء ٹی تیل و گیس انا بشخ اٹی براہ راست پیشن نا زرکاری نا مالیت 559.6و مالی سال 2013-14ء ٹی دا بشخ اٹی براہ راست پیشن نا زرکاری نا کچ 502ملین ڈالر ریکارڈ کننگا۔ حساب وکتاب نا رداٹ مالی سال2014-15 ء ٹی دا بشخ اٹی براہ راست پیشن نا زرکاری نا کچ 300.5ملین ڈالر، مالی سال 2015-16ء ٹی 248.9 ، مالی سال 2016-17 ء ٹی 146ملین ڈالر وخت اس کہ مالی سال 2017-18ء ٹی تیل وگیس انا بشخ اٹی براہ راست پیشن نا زرکاری نا کچ 194.8 ملین ڈالر ریکارڈ کننگا۔ ہنداوڑ گدرینگوک آ 10مالی سال آتے ٹی دابشخ اٹی جم وڑاٹ 3904.2ملین ڈالر نا براہ راست درملکی زرکاری مسنے۔ اسٹیٹ بینک آف پاکستان نا حساب وکتاب نار داٹ مالی سال 2017-18 ء ٹی جم اٹنگا براہ راست درملکی زرکاری نا مالیت 2 ارب 76کروڑ 76لکھ ڈالر مسنے۔ اوپارے کہ روایتی طولی (ورٹیکل) ڈرلنگ نا جاگہ غا شیل گیس انا پٹنگ کن عرضی ڈرلنگ اٹ کاریم ہلنگک و داڑاخڑچ آک روایتی ڈرلنگ آن 19 گنا زیات بریک ہنداخاطران براہ راست درملکی زرکاری ءِ اتنگ کن حکومت ءِ خصوصی وڑاٹ بایدے کاریم کروئی مرے۔
