کوئٹہ۔ 31 دسمبر (اے پی پی) قومی احتساب بیورو بلوچستان سال 2018 ء ٹی ہم کرپٹ عنصر آتا برخلاف بے پرخ کارروائی تا تسلسل ءِ برجا تخسا کم و ود اسہ ارب روپئی ریکور کرسا 25 بندغ ءِ دزگیر کرینے، 13ریفرنس دائر کرے، وخت اس کہ احتساب عدالت نا کنڈآن چندی بندغ آتے جرمانہ و سزا ہم بنفنگا۔ اینخو نا سال مسہ مسکوہی وزیر اعلیٰ، اِرا مسکوہی اسپیکرز، 20 آن زیات اسمبلی نا باسک و بیوروکریٹ آتا برخلاف وڈی خوری نا جاست وپاست نا بناءِ کننگا۔ گوادر تون اوار بلوچستان نا کیہی شار تے ٹی ارب آ روپئی مالیت نا سرکاری ڈغار تا غیر کانودی الاٹمنٹ، فنڈنغڑد نا بھلا اسکینڈل تشت ازبام، محکمہ خور، مال ، تعلیم ، جان جوڑی ، اے جی آفس، کیوڈی اے، بی ڈی اے ٹی ہم وڈی خوری نا بھلا اسکینڈل آتے پاش کننگا۔ 100 آن زیات انکوائری نا بناوخت اس کہ 25بھلا کیس آتیا ترندی اٹ کاریم برجاءِ۔ سرجم احوال آتارداٹ سال 2018 ء ٹی ہم نیب بلوچستان نا کنڈآن وڈی خور عنصر آتا برخلاف پبی کارروائی مس، گدرینگوک آ سال قومی احتساب بیورو بلوچستان چندی کیس آتے ٹی 25بندغ ءِ دزگیر کرسا 13ریفرنس دائر کرے۔ ہرافتیان چندی بندغ آتے احتساب عدالت سخت ءُ سزا بنفے ، نیب چندی جاست وپاست اٹی سرسہبی دوئی کرسا وڈی خوری نا گواچی مروک آ کم و ود اسہ ارب روپئی نا بھلو زر اس کرپٹ عنصر آتیان ریکور کرسا سرکاری خزانہ ٹی پدی اتنگ ءِ ممکن جوڑ کرے وخت اس کہ مشتاق رئیسانی کیس اٹی سوا ارب نا میرات آتے ہم بلوچستان نا حکومت نا دوٹی تننگا۔ وخت اس کہ کرپٹ عنصر آتا برخلاف جاگہ ءِ تنگ کرسا ارب آ روپئی نا کرپشن نا 25بھلا کیس آتیا ترندی اٹ کاریم برجاءِ، سال 2018 ء ٹی نیب ءِ 1100 غاو رسینگا ہرافتیا کانود نا رداٹ عمل کرسا کم و ود 100 انکوائری وخت اس کہ 25بھلا کیس آتے ٹی جاست وپاست نا بناءِ کننگا۔ ملوک آ غاو و نیب انا انٹیلی جنس سیل انا رپورٹ آتے ٹی محکمہ مال، ایکسائز اینڈ ٹیکسیشن ، تعلیم ، جان جوڑی، اے جی آفس، لوکل گورنمنٹ ، کیو ڈی اے، بی ڈی اے تون اوار چندی محکمہ غاتا کرپٹ عنصر آتا برخلاف وڈی خوری نا بھلا اسکینڈل آک مون آ بسر۔ قومی احتساب بیورو بلوچستان بلوچستان اٹی مسہ مسکوہی وزیراعلیٰ، 2مسکوہی اسپیکر تون اوار 20 آن زیات اسمبلی نا باسک و بیورو کریٹ آتا برخلاف وڈی خوری نا دوبہ غاتا جاست و پاست ہم کانود نا رداٹ برجاءِ۔ اینخو نا سال مسکوہی وزیرخور میر اظہار کھوسہ، سیکرٹری خور نور محمد پرکانی، ایم ڈی جیڈا محبوب دشتی، جی ایم فنانس وقاص احمد تون اوار چندی بااثر بندغ آتے دزگیر کرے۔
