ہرنائی۔ 31دسمبر (اے پی پی) ڈپٹی کمشنر عظیم جان دمڑ پارینے کہ راج اٹی صحافت تمبہ نا حیثیت تخک ، السی ویل آتے تالان کننگ اٹ میڈیا نا اہم ءُ کڑد اس مریک، اینو میڈیا نا دورءِ، صحافیک مدام راستکی تیا رپورٹنگ کیر، ہرنائی نا ہندی صحافی تا مثبت رپورٹنگ و السی ویل آتے تالان کننگ ستاکڑزک۔ ضلعی انتظامیہ صحافی تتون ہروڑاٹ کمک کیک۔ داخیال آتا درشانی ءِ او پریس کلب نا ہرنائی (ر) انا نمائندہ ڈل اتون اوڑدہی ٹی گپ و تران کرسا کرے۔ ڈل اٹی حنیف ترین، یزدانی ترین، شاہ بلوچ و ایلو ہندی صحافیک اوار ئسر، داوخت آ اسسٹنٹ کمشنر کلیم اللہ رودی تون اوار چندی محکمہ غاتا ضلعی آفیسر آک ہم ساڑی ئسر ، ڈپٹی کمشنر عظیم جان دمڑ صحافی تتون ہیت وگپ کرسا پارے کہ ساڑی آ دور اٹی میڈیا نا کڑد آن نہ من مننگ کپک، صحافی تا رپورٹنگ ویل آتا پیدواری آن ویل آک ایسر مریرہ، اوپارے کہ صحافیک رپورٹنگ اٹ خیال کیر و خبرءِ پک کرسا شینک کیر انتئے کہ غلط رپورٹنگ آن ویل ودی مریک ۔ اوپارے کہ مثبت رپورٹنگ آن ضلع ہرنائی نا الس نا حقی ویل آک بروخت ایسر مننگ کیرہ ، اوپارے کہ ضلعی انتظامیہ ہندی صحافی تون وسیلہ غاتون سلسا ہروڑاٹ کمک کیک داکان بیدس ڈپٹی کمشنر ہرنائی عظیم جان دمڑ پارے کہ ای ہراتم بطور ڈپٹی کمشنر ہرنائی عہدہ نا چارج ءِ سنبھالانٹ دے و نن ضلع ہرنائی نا الس نا بنداوی ویل آتا ایسر کننگ ناپبی کوشست کرینٹ و کننگ اُٹ، اوپارے کہ ای ضلع ہرنائی نا غٹ یونین کونسل ہراکہ بے کچ مر مر سخت کسر علاقہ غاتیا تالان ءُ سرجم دورہ ءِ کرینٹ و الس ءِ مون تروک ویل ومشکل آتے معلوم کرینٹ و دا غٹ ویل آتے ایسر کننگ کن کوشست کننگ اُٹ اوپارے کہ ضلع نا مر مر انگا علاقہ غاتے ٹی ساڑی تعلیمی ادارہ جان جوڑی نا ہند جاٹ آتا کاریمی کننگ کن تعلقدار محکمہ غاتون اواری اٹ گام گیج کننگ اُن تانکہ الس نا جان جوڑی نا طبی آسراتی اوفتا درگہ غا دوبرے و ضلع نا تعلیمی ادارہ غاتے کاریمی جوڑ کرسا نیزگار لمہ و باوہ غاتا چناک تعلیم نا زیور آن آراستہ مننگ کیر ، ڈپٹی کمشنر عظیم جان دمڑ پارے کہ ضلع ہرنائی نا الس نا غٹ اجتماعی ویل آتے ایسر کننگ جان جوڑی تعلیم و ایلو آسراتی تے اوفتا درگہ غا تننگ و الس نا جان و مال انا رکھ و امن و ایمنی اولی اولیت ءِ۔
