اسلام آباد۔ 30دسمبر (اے پی پی) مزن وزیر عمران خان ترکی ءِ صدر رجب طیب اردوان ءِ داتگیں دعوت ءِ پد ءَ 3 ءُُ 4 جنوری ءَ ترکی ءِ تر ءُُ تاب ءَ کنت اِنت۔ درئی کارانی کارگس ءِ نیمگ ءَ جاڑی بوتگیں یک شمبے ءِ روچ ءَ بیان ءِ رد ءَ مزن وزیر عمران خان ترکی ءِ اے اولی تر ءُُ تاب ءَ کنت۔ آئی ءِ ھمبراھی ءَ وزیر ءِ درئی کار شاہ محمود قریشی، وزیر ء، منصوبگ بندی مخدوم خسرو بختیار، مزن وزیر ءِ مشیر برائے عبدالرزاق داؤد بنت اِنت۔ تر ءُُ تاب ءِ ساھت ءَ مزن وزیر ترکی ءِ صدر رجب طیب اردوان ءَ گوں گند ءُُ نند کنت اِنت۔ گند ءُُ نند ءِ ساھت ءَ دوئیں ملک آنی نیام ءَ ھواریں یکوئی آنی سر ءَ چار ءُُ تپاسی ھم گرگ بیت۔ ایشی ءَ ابید دمگی ءُُ میاں اوستمانی جاور ھال آنی سر ءَ چار ءُُ بچار ھم کنگ بیت۔ مزن وزیر عمران خان ترکی ءَ بزنس فورم ءَ گوں گشتانک ءَ ابید ترک تاجر ءُُ سرمایہ کار آں گوں انقرہ ءَ گند ءُُ نند کنت اِنت۔ بیان ءِ رد ءَ پاکستنا ءُُ ترکی ءِ نیام ءَ راجدپتری یکوئی برجا اِنت دوئیں ملک آنی نیام ءَ یکوئی ءِ ریشگ نیک راھی ءُُ دود ءُُ ربیدگی ریشگ آنی سر ءَ اوشتاتگ اَنت۔ پاکستان ءُُ ترکی ءِ نیام ءَ سیاسی، اقتصادی، دیمپانی، دود ءُُ ربیدگی ءُُ السی رابطہ آنی وسیلگ ءَ یک ءِ دومی ءَ گوں یکوئی برجا اِنت ءُُ وھد ءِ گوزگ ءِ گوما اے یکوئی مھکم تر بوھان اَنت۔ مزن وزیر ءِ تر ءُُ تاب ترکی ءَ گوں دوئیں ملک آنی حکومت ءُُ الس آنی نیام ءَ براتی براتی ءُُ یکوئی گیش دیمروئی کن اَنت۔ ایشی ءَ چہ ابید ھاسیں رنگ ءَ آسر، اقتصادی، تجارتی ءُُ سرمایہ کاری ءِ شوبگ ءَ نوکیں کشک پچ بنت ءُُ کمک آنی تہءَ گیش گیشی بیت۔
