اسلام آباد۔ 28 دسمبر (اے پی پی) وزیراعظم نا خصوصی کمکار اوورسیز پاکستانیز سید ذوالفقار عباس بخاری پاکستان اٹی جرمنی نا سفیر مارٹن کوبلر تون اوڑدہی کرینے۔ اوڑدہی ٹی وزیراعظم نا سلاہکار عثمان ڈار و جرمن زرکاری بینک انا نمائندہ غاک ہم ساڑی ئسر۔ جرمنی نا سفیر مارٹن کوبلر پارے کہ جرمنی 2020 ء ٹی مچ آ دنیا غان تکنیکی افرادی واک درآمد کیک۔ پاکستان اٹی ورناتے کن تکنیکی و کسبی تعلیم کن پلان آف ایکشن جوڑ کننگ آ امنا کننگانے۔ پاکستان نا ورناتے جرمنی نا 2020 پروگرام اٹی غٹ آن زیات وارخواہی تننگ آہم گپ و تران کننگا۔ جرمنی ٹی چندی بشخ و اوفتے کن المی مہارت آ احوال، اوڑدہی ٹی ہڑتوم آ کنڈآن بنجائی و صوبائی کہول آ کمکاری ءِ ودفنگ آ امنا کننگانے۔ اوڑدہی ٹی وزیراعظم نا خصوصی کمکار ذوالفقار عباس بخاری پارے کہ روایتی تعلیم آن دنیا نا مقابلہ ءِ کننگ مشکل مسنے داسہ پوسکن آ و تکنیکی تعلیم نا کنڈآ ہنوئی ءِ ۔ اوپارے کہ ورناتے کسبکار جوڑ کننگ کن زوت تکنیکی تعلیمی پروگرام اس بناکننگک۔
