کوئٹہ۔ 28 دسمبر (اے پی پی) صوبائی وزیر جان جوڑی میر نصیب اللہ مری پارینے کہ بلوچستان نا غٹ علاقہ غاتے ٹی خاہوتی منصوبہ بندی نا معیاری و گچین آسراتی تا فراوانی کن صوبائی حکومت و سرکڑدہ غاک پرعزم ءُ، بلوچستان اٹی ٹریننگ مینجمنٹ انفارمیشن سسٹم نا جوڑ کننگ آن فیملی پلاننگ نا رداٹ تروک آ خذمت آتا دنگ ءِ جوان وڑاٹ ودفنگک ہرا درکار ہدف آتا دوئی کننگ اٹ کمکار جوڑ مریک۔ داخیال آتا درشانی ءِ او جمعہ نادے آ یو ایس ایڈ نا کمک اٹ Jhpiego کارپوریشن نا سپورٹ آن بناکروک پروگرام نا بنائی دود آن مہمان خاص انا حیثیت اٹ تران کرسا کرے۔ دود آن ایڈیشنل سیکرٹری جان جوڑی ندیم سمالانی ، ڈی جی ہیلتھ بلوچستان ڈاکٹر شاکر بلوچ ، ڈاکٹر عبدالواحد بلوچ، ڈاکٹر نائلہ احسان ، ڈاکٹر مختیار علی زہری، ڈاکٹر طارق مسعود تون اوار ایلوفک ہم تران کریر۔ صوبائی وزیر جان جوڑی میر نصیب اللہ مری پارے کہ بلوچستان اٹی دا پروگرام نا سوب خاندانی ڈٹ بندی و پوسکن ودی مروک آ چناتا حساب وکتاب ءِ مرتب کرسا گچین حکمت عملی اسے نا جوڑ کننگ اٹ خاطر خواہ کمک رسینگک۔ اوپارے کہ ای یو ایس ایڈ نا ٹیم انا منت وار اُٹ کہ او بلوچستان اٹی لمہ و چناتا بقاء و جان جوڑی نا پروگرام (MCSP) ٹی مالی کمک اتون اوار اوار آن لائن ڈیٹابیس نا نظام اتون گنڈا، و دا باسک آتا ہم منت وار اُٹ ہرافک داکاریم اٹ تینا کڑد ءِ ادا کریر۔ میر نصیب اللہ مری پارے کہ 2010 ء ٹی ہژدہ می ترمیم نا رداٹ حکومت پاکستان بھلو سرکاری معاملہ غاتے صوبہ غاتا حوالہ کرے اوکان پد حکومت بلوچستان محکمہ جان جوڑی ءِ بھاز مشکل آتون مون تروئی تما ہراٹی لمہ و چناتا جان جوڑی نا معاملہ غاتون زچگی ٹی مرک آتا کچ ءِ توننگ و حساب وکتاب ءِ جمع کننگ بے کچ سخت ءُ عمل اس ئس دا چرجوئی ٹی محکمہ جان جوڑی بہبود آبادی تون درکار آب انا بندغ آتا کمتی اتون اوار اوار مالی مشکل آک ہم مون تروک ئسر۔ اوپارے کہ ایم سی ایس پی پروگرام آن مست غٹ حساب وکتاب ءِ فائل و رجسٹرڈ آتے قلمبند کننگاکہ ہرافتے ہڑدڑی کہول آ جمع کننگ بے کچ مشکل ءُ عمل اس ئس ولے داسہ کمپیوٹرائزڈ و پوسکن جمع بندی دا غٹ مشکل آتے چٹفینے بلکن دا پوسکن آ ڈیٹا بیس سسٹم آن بلوچستان نا شونداری ایجنڈا و گچین خاندانی منصوبہ بندی ٹی اہم ءُ پیش رفت اس مریک اوڑتون اوار اوار زالبول ءِ بااختیار جوڑ کننگ، اوفتے ٹی کسب کاری نا رجحان ودی کننگ و مسن تے تعلیم نا کنڈآ اتنگ اٹ ہم آسانی ودی مریک۔ اوباوری ترفے کہ محکمہ جان جوڑی ، محکمہ بہبود آبادی ، پی پی ایچ آئی تون پورو کمک کیک تانکہ نن دا پوسکن آ ٹیکنالوجی آن پورو فائدہ ہرفنگ کین۔ Jhpiego کارپوریشن پاکستان نا کنٹری منیجر ڈاکٹر فوزیہ اسد پارے کہ محکمہ جان جوڑی بلوچستان، محکمہ بہبود آبادی و پیپلز پرائمری ہیلتھ کیئر تینا شیٹوز آتا تین پہ تینی اواری اٹ بناکروک دا پروگرام نا سوب فیملی پلاننگ نا بابت غٹ ڈیٹا آن لائن دوئی مریک و فیملی پلاننگ نا پوسکن آ طبی پٹ وپول آ مبنی آن لائن سروس آن بلوچستان نا 20 ضلع غاتا فیملی پلاننگ یوزر آک فائدہ ہرفنگ کیرہ۔
