کوئٹہ۔ 28 دسمبر (اے پی پی) نیشنل پارٹی نا راہشون و باسک صوبائی اسمبلی احمد نواز بلوچ و اختر حسین لانگو ئسک پارینو کہ ہراڑے گوازی تا پڑ آباد مریک ہموجاگہ نا ہسپتال آک ویران مریرہ حکومت بلوچستان ورناتے گوازی تا وارخواہی ایتے تو گوازی گر آک جہانی کہول آ ملک و صوبہ نا پن ءِ روشن کننگ کیرہ۔ داہیت ءِ اوفک اول آل کوئٹہ سردار اختر جان مینگل کرکٹ ٹورنامنٹ نا فائنل میچ انا ایسر ی آ اڈ ہلوک آ دود آن تران کرسا پاریر ٹورنامنٹ نا فائنل میچ وحدت گرین و اوغان آریانہ نا نیام اٹ گوازی کننگا ہرا وحدت گرین نا ٹیم سنسنی خیز مقابلہ غان پد 23رنز اٹ کٹا ، داکان مست مہمان خاص باسک صوبائی اسمبلی احمد نواز بلوچ و اختر حسین لانگو نا ہڑتوم آ ٹیم تا گوازی گر آتون درستی راستی ءِ کرفنگا ۔ باسک صوبائی اسمبلی احمد نواز بلوچ و اختر حسین لانگو ئسک پاریر کہ ورناتے بایدے مرے کہ او تعلیم تون اوار اوار گوازی تے ٹی ہم بشخ ہلیر انتئے کہ گوازی تے ٹی بشخ ہلنگ آن ورناک منشیات و ایلو راجی گندہی تیان مر مریرہ۔ اوفک پاریر کہ بلوچستان نا ورناگوازی گرتے ٹی ٹیلنٹ نا ہچ ءُ کمتی اس اف اگہ اوفتے جوان ءُ وارخواہی اس تننگے تو دا ورناگوازی گرآک جہانی کہول آ ہم ملک و صوبہ نا پن ءِ روشن کننگ کیرہ۔ اوفک پاریر کہ بلوچستان نیشنل پارٹی گوازی تا مون آ دننگ کن ہروڑنا کمک کن تیار ءِ۔ اوفک تینا کنڈآن ٹورنامنٹ کمیٹی کن 20ہزار روپئی نا پڑو ءِ کریر و گوازی گر آتے ٹی انعام بشخ وپانٹ کریر۔
