اسلام آباد۔ 27 دسمبر (اے پی پی) وزیراعظم عمران خان وزیراعلیٰ پنجاب سردار عثمان بزدار نا لس خلقت ءِ تین تون اوار تولفسا ویل آتے بنسا عکس ءِ تینا ٹویٹر اکاؤنٹ آ پوسٹ کرسا پارینے کہ ’’دادے پوسکن آ پاکستان‘‘۔ دا عکس اٹی وزیراعلیٰ پنجاب سردار عثمان بزدار ءِ لس خلقت ءِ تین تون اوار صوفہ غا تولفسا اوفتا ویل آتے بنسا نشان تننگانے۔ عکس اٹی مسہ بزرگ وزیراعلیٰ تون اوار اسہ ہی صوفہ غا تولسا اودے تینا ویل آتیان معلومدار کننگ ءُ وخت اس کہ وزیراعلیٰ اوفتا درخواست آتے دوٹی ہرفینے و اوفتا ویل آتے جوانی اٹ بنسا خننگ انگ ءِ۔ وزیراعظم وزیراعلیٰ پنجاب نا عاجزی و لس خلقت تون خڑکی رابطہ تخنگ آن متاثر مرسا دا عکس ءِ تینا ٹویٹر اکاؤنٹ آ شیئر کرے و تینا ٹویٹ اٹی عکس آ تران کرسا پارے کہ ’’دادے پوسکن آ پاکستان۔ اسہ عکس اس ہزار لوز آتیان زیات قدرو قیمت تخک‘‘۔داڑے داہیت ذکر انا قابل ءِ کہ وزیراعظم عمران خان حکمران تپہ نا شاہانہ زندی طرز و لس خلقت تون مری ءِ تینا تقریر و بیان آتے ٹی وار وار آ ہدف نا نشانہ جوڑ کرسا کرینے و او مدام کفایت شعاری، سادگی و لس خلقت تون خڑکی رابطہ تخنگ آ زور شاغانے۔
