اسلام آباد۔ 26دسمبر (اے پی پی) وزیراعظم عمران خان پارت کرینے کہ وزارت پٹرولیم گیس دُزی نا سوب نسخان آتے ٹی کمتی نا بابت سرجم ڈٹ اس پیش کے، قابل تجدید توانائی نا بابت پالیسی ءِ جنوری نا ایسر اسکان حتمی دروشم تننگے، توانائی نا بشخ اٹی نظم و نسق نا بابت مون تروک ویل آتا ایسری و تعلقدار محکمہ غاتا نیام اٹ رابطہ غاتے ٹی گچینی نا گرج آ زور شاغسا وزیراعظم توانائی نا فراوانی ٹی تعطل آن بچنگ کن توانائی نا بشخ اٹی طلب و رسد نا بابت بروکت و درست تخمینہ نا گرج آ زور شاغانے۔ توانائی نا بارواٹی کابینہ کمیٹی نا دیوان چارشنبے نادے آ وزیراعظم عمران خان نا کماشی ٹی مس۔ دیوان اٹی وزیراعظم ءِ توانائی نا بشخ اٹی طلب و رسد نا حالیت، بروک آ شش تُو اکن پٹرولیم وتوانائی ڈویژن نا ڈٹ ، ساڑی آ توانائی مکس، ہندی و امپورٹڈ گیس انا دستیابی و فراوانی و توانائی نا بشخ انا بابت چندی ویل آتیا پیش رفت آ سرجم احوال تننگا۔ دیوان اٹی یخ انا موسم اٹی سوئی ناردرن گیس پیپ لائنز و سوئی سدرن گیس کمپنی نا گیس مینجمنٹ ڈٹ آتیا احوال تننگا۔ دیوان اٹی پاریر کہ اناگت درجہ حرارت کم مننگ و گیس انا طلب اٹی ودکی مننگ نا باوجود اُرائی، کمرشل صارف و زیرو ریٹڈ انڈسٹری تے ساڑی آ موسم اٹی گیس انا فراوانی ءِ المی جوڑ کننگانے۔ سی این جی و لس صنعت آتا کیپٹوپاور پلانٹس آتے کن گیس لوڈشیڈنگ اٹی کمتی کن ہم گام گیج کننگ انگ ءِ۔
