کراچی۔ 26 دسمبر (اے پی پی) بنجائی وزیر مملکت داخلہ شہریار آفریدی گورنر ہاؤس کراچی ٹی گورنر سندھ عمران اسماعیل تون اوڑدہی کرے و اوکان پد گورنر سندھ اتون اوار لاء اینڈ آرڈر نا بابت بڑزکو کہولی دیوان اسے نا کماشی ءِ کرے۔ دیوان اٹی چیف سیکرٹری سندھ، ڈی جی رینجرز، آئی جی سندھ پولیس آن بیدس کانود نافذ کروک آ ادارہ و انٹیلی جنس ایجنسی تا سینئر آفیسر آک ہم ساڑی ئسر۔ دیوان اٹی صوبہ و خاص کر کراچی نا امن و ایمنی نا حالیت آتا سرجم جاچ ءِ ہلنگا۔ دیوان ٹی ساڑی آ ٹارگٹ کلنگ نا واقعہ غاتیا ہم شرہ مس۔ گورنر سندھ عمران اسماعیل کراچی نا امن اٹی رینجرز آتا کڑد انا ستاءِ کرسا پارے کہ کراچی ٹی سیف سٹی ماڈل نافذ کننگ نا گرجءِ۔ گورنر سندھ عمران اسماعیل پارے کہ ساڑی آ حالیت آک بھلا گام گیج آتا متقاضی ءُ، غٹ کانود نافذ کروک آ ادارہ غاک تین پہ تینی کمک اٹ شرپسند آتا برخلاف ٹھوس کارروائی ءِ المی جوڑ کیر۔ داوخت آ شہریار آفریدی کراچی ٹی دہشت گردی نا ساڑی آ واقعہ غاتا بابت سرجم احوال تننگا و داوخت اسکان نا پیش رفت آن ہم معلومدار کننگا۔ وزیر مملکت داہیت آ زور شاغا کہ امن دشمن تا برخلاف کارروائی و سخت انگا ایکشن اٹی ہچ وڑنا کسر ءِ ہلنگپ و الس نا جان و مال انا رکھ ہر حال اٹ المی جوڑ کننگے۔ شہریار آفریدی پارے کہ ریاست نا غٹ شاری تا رکھ اولی زمواری ءِ۔ گراوئنڈ انٹیلی جنس و اسیجا کارروائی تا کمک اٹ شرپسند آتا نیٹ ورک آتے پرغنگے تانکہ رکھ و پرسکون راج اسے نا آخبت ءِ المی جوڑ کننگ مرے۔
