اسلام آباد۔ 26دسمبر (اے پی پی) اسٹیٹ بینک پارینے کہ اینخو نا مالی سال (2018-19) نا اولیکو پنچ تُو اٹی روایتی بینک آتا کنڈآن نجی بشخ ءِ وام تا فراوانی ٹی 400 درسد ودکی مسنے ۔ بینک انا جاری حساب وکتاب نا رداٹ گدرینگوک آ مالی سال انا مقابلہ ٹی جاری مالی سال اٹی (یکم جولائی آن 5دسمبر) اسلامی بینک آتا کنڈآن نجی بشخ ءِ وام تا فراوانی ٹی 8 گنا نا ودکی مس۔ جاری مالی سال 5دسمبر اسکان روایتی بینک آتا کنڈآن نجی بشخ ءِ 268.5ارب روپئی نا وام جاری کننگا وخت اس کہ گدرینگوک آ مالی سال انا ہنداوخت اٹی نجی بشخ ءِ روایتی بینک آتا کنڈآن بیرہ 65 ارب روپئی نا وام تننگاسس۔ ارٹ میکو کنڈ اسلامی بینکاری نا بشخ اٹی وام تا فراوانی ہشت گنا ودکی آن 48.5 ارب روپئی سلیس۔ گدرینگوک آ سال ہندا وخت اٹی دانا حجم 6.2 ارب روپئی ئسک۔ ہنداوڑ گدرینگوک آ مالی سال انا مقابلہ ٹی جاری مالی سال انا پنچ تُو اٹی روایتی بینک آتا کنڈآن نجی بشخ ءِ وام تا فراوانی ٹی 400 درسد یعنی 203.5 ارب روپئی وخت اس کہ اسلامی بینکاری نا بشخ انا کنڈآن نجی بشخ ءِ تروک آ وام تا کچ اٹی 42.3 ارب روپئی نا نمان ودکی ریکارڈ کننگا۔
