خیبر پختونخوا نا حلقہ پی کے 30 مانسہرہ ون اٹی ضمنی گچین کاری نا شیڈول نا پڑو، پولنگ 26 فروری آ مریک

اسلام آباد۔ 26 دسمبر (اے پی پی) الیکشن کمیشن خیبر پختونخوا نا حلقہ پی کے 30 مانسہرہ ون اٹی ضمنی گچین کاری نا شیڈول نا پڑو ءِ کرینے۔ چارشنبے نادے آ جاری مروک آ شیڈول نا رداٹ ضمنی گچین کاری ٹی بشخ ہلنگ کن پندار کاغد آتے ریٹرنگ آفیسر تون 29 دسمبر آن یکم جنوری اسکان جمع کرفنگ کیرہ۔ پندار کاغد آتا جانچ پڑتال 7 جنوری آ مریک۔ پندار کاغد آتامنظور یا مسترد مننگ نا برخلاف اپیل دائر کننگ نا 11جنوری آخیری تاریخ مریک۔ ایپلٹ ٹریبونل 15جنوری اسکان اپیل آتیا فیصلہ کیک۔ اومیتدار آتا نظرثانی مروک فہرست 16جنوری آ شینک کننگک۔ اومیتدار 17 جنوری اسکان تینا پندار کاغد آتے پدی ہلنگ کیرہ۔ اومیت دار آتے گچین کاری نشان 18 جنوری آ الاٹ کننگک۔ پولنگ 26فروری آ مریک۔