احتساب عدالت نا جج محمد ارشد ڈک کروک آ فیصلہ ءِ بنفے، کمرہ عدالت اٹی ساڑی نیب کمامدارآک نواز شریفءِ تحویل اٹی ہلکر ملک
اسلام آباد۔ 24دسمبر (اے پی پی) احتساب عدالت مسکوہی وزیراعظم محمد نواز شریف نا برخلاف فلیگ شپ انوسٹمنٹ و العزیزیہ ریفرنسز نا ڈک کروک آ فیصلہ ءِ بنفسا اودے العزیزیہ ریفرنس اٹی 7سال قید بامشقت، 25ملین ڈالر جرمانہ و دہ سال اکن نابودی نا سزا بنفے وخت اس کہ فلیگ شپ انوسٹمنٹ ریفرنس اٹی مسکوہی وزیراعظم محمد نواز شریف ءِ بری کرے اوکان پد کمرہ عدالت اٹی ساڑی نیب کمامدارآک اودے تحویل اٹی ہلکر ۔ احتساب عدالت نا جج محمد ارشد ملک نیب انا دائرکروک ریفرنس آتیا فیصلہ ءِ چارشنبے نادے 19 دسمبر آ ڈک کریسس ہرا دے او دوشنبے نادے آ بنفے۔ داوخت آاحتساب عدالت نا دامون ایمون سیکورٹی نا سخت بست و بند کننگاسس۔ مسلم لیگ (ن) نا راہشون و کارندہ غاک سہب انا ہفت ءُ نیم بجہ غا احتساب عدالت آ سرمننگ نا بناءِ کریر۔ مسکوہی وزیراعظم احتساب عدالت نا فیصلہ ءِ بِننگ کن اسہ دے اس مست یک شنبے نا سہب اتون ہی اسلام آباد آ سرمسوسس۔ مسلم لیگ (ن) نا راہشون احسن اقبال، مریم اورنگزیب ، مسکوہی وزیراعظم شاہد خاقان عباسی ، مہتاب عباسی و بزرگ راہشون جاوید ہاشمی ئسک ہم احتساب عدالت آ سرمسر۔ شاہد خاقان عباسی و گڑاس ایلو لیگی راہشون تے عدالت نا تہہ ٹی ہِننگ نا موکل تننگتو۔ مسکوہی وزیراعظم محمد نواز شریف احتساب عدالت آ ہِننگ آن مست تینا وکیل خواجہ حارث تون اوڑدہی کرے۔ داوخت آ حمزہ شہباز ، پرویز رشید، طلال چوہدری، طارق فضل چوہدری و مسکوہی گورنر سندھ محمد زبیر ئسک ہم ساڑی ئسر۔ داکان مست سپریم کورٹ پاناما کیس اٹی 28 جولائی 2017 ء آ محمد نواز شریف ءِ نابود گوندسا اونا و اونا چناتا برخلاف کٹیا غان زیات میرات جوڑ کننگ آ ریفرنس دائر کننگ نا پرمان کریسس۔ دا عدالتی پرمان آ 8 ستمبر 2017 ء آ مسکوہی وزیراعظم محمد نواز شریف و اونا چناک و سالم کیپٹن (ر) صفدر نا برخلاف مسہ ریفرنس دائر کریسس۔ احتساب عدالت نواز شریف ءِ 19 ستمبر 2017 آ پیش مننگ نا حکم تس ولے او 26ستمبر آ اولیکو وار احتساب عدالت نا جج محمد بشیر نا روبرو پیش مس۔ العزیزیہ ریفرنس اٹی 22 و فلیگ شپ اٹی 16گواہ پیش مسر۔ ہڑتوم آ ریفرنس آتے ٹی 83سماعت مس و کارروائی پانزدہ تُو یعنی 19 دسمبر آ پورو مس۔ نواز شریف 130 وار عدالت اٹی پیش مس اودے پانزدہ وار جیل آن احتساب عدالت آ سرکننگا۔ اولیکو 103 سماعت آتے جج محمد بشیر کرے ہرافتے ٹی ایون فیلڈ ریفرنس ہم اوار ئس۔ ٹرائل ایلو عدالت آ منتقل مننگ آن پد العزیزیہ و فلیگ شپ ریفرنس اٹی جج ارشد ملک 80 سماعت کرے اوکان پد بیست ءُ چار دسمبر اسکان فیصلہ ءِ ڈک کریسس۔
