کوئٹہ۔ 24 دسمبر (اے پی پی) بنجائی وزیر خزانہ اسد عمر خان پارینے کہ ملک اٹی ہندن ءُ اقتصادی و واپاری پالیسی جوڑ کننگ اُن ہراڑآن کشت وکشار و صنعتی بشخ آتا نمان شونداری مرے و روزگار نا زیات آن زیات وارخواہی ودی مننگ کے۔ بلوچستان ملک انا غٹ آن بھلا صوبہ ءِ ، ہراڑے کشت وکشار نا شونداری کن بنجا و صوبائی حکومت اواری اٹ کاریم کیرہ۔ داخیال آتا درشانی ءِ او دوشنبے نادے آ چیمبر آف کامرس بلوچستان نا عہدیدار آتون اوڑدہی و واپاری مشکل آتا ایسری نا سلاہ و سوج آتا بابت دیوان آن تران کرسا کرے۔ داوخت آ ڈپٹی اسپیکر قومی اسمبلی قاسم خان سوری، چیمبر ز آف کامرس بلوچستان نا سرپرست اعلیٰ غلام فاروق ، صدر جمعہ خان تون اوار ایلو عہدیدار آک ہم ساڑی ئسر۔ بنجائی وزیر خزانہ پارے کہ ملائیشیا تون اوار جہانی مانگ انا رداٹ بلوچستان و مچ آ ملک اٹی کشت وکشار حلال فوڈ و منرل تون اوار چندی بشخ آتے ٹی زرکاری نا بھلو گنجائشت اس ساڑی ارے، سی پیک نا عمومی حالیت آتے ٹی بروک آ مرحلہ صنعت آتا جوڑ کننگ نا ءِ ننا کوشست ءِ کہ بروک آ مرحلہ ٹی جتا چیمبر ز آف کامرس نا نمائندگی ءِ المی جوڑ کننگے، بلوچستان نا ایکسپورٹرز آتا مشکل آتا جاچ ءِ ہلسا اوفتے ایسر کینہ، واپاری پالیسی تا جوڑ کننگ اٹ نجی بشخ انا سلابت ءِ اوار کینہ ، اوپارے کہ ملک آن نیزگاری نا چٹفنگ نا بی آئی ایس پی تون اوار ایلو گچین آ پروگرام تے درستی راستی کرفنہ وخت اس کہ ملک اٹی ورناتا لائخی تیان فائدہ ہرفنگ کن اوفتے شونداری نا بھلو وراخواہی فراوان کینہ ، اوپارے کہ جہانی واپاراٹی دہرا معیار بایدے چٹے ننا کوشست ءِ کہ ایران تون اوار ڈیہہ نا غٹ ملک آتون گچین واپاری تعلقداری استوار کین، اوپارے کہ نن واپاری تعلقداری تا گچینی کن بھارت نا کنڈا خیر سگالی نا دوءِ مون آ کرین ولے اونا مثبت ورندی ملتو۔ اوپارے کہ ملک اٹی ساز گار واپاری چاگڑد نا جوڑ کننگ کن ہندن ءُ نظام اس جوڑ کننگ خوانہ ہراڑآن کاروباری تپہ غاتے مون تروک ویل و یچڑ آک چٹر و کاروباری تپہ غاتے زیات آن زیات آسراتی دوبرے، اوپارے کہ اسمگلنگ نا چٹفنگ کن جامع ڈٹ اس اتنگ اُن ہراڑآن پوسکن آ وڑوڈول آتیا نئے بیرہ اسمگلنگ چٹک بلکن سیکورٹی نا حالیت آتے ٹی نمان گچینی بریک۔ پاک اوغان سیم آ باڑ خلنگ آن پد اسمگلنگ چٹک۔ اوپارے کہ منہ وخت مست ملک اٹی کرنٹ اکاؤنٹ نسخان اِرا ارب روپئی ئس ہرانا سوب آن دانا چٹفنگ کن اسٹیٹ بینک ءِ دمدستی گام گیج کروئی تما داسہ دا نسخان کُٹسا اسہ ارب روپئی مسنے و دا پدریسہ کمتی نا کنڈآ کاہک اوکان پد اسٹیٹ بینک اکن ریلیف نا فراوانی ممکن مننگ کیک۔ وزیر خزانہ اسد عمر خان پارے کہ پاک ایران ٹریڈ ءِ مون آ دننگ کن 30 دے انا تہہ ٹی رپورٹ اس تیار کننگ نا پارت جاری کرینے، او باوری ترفے کہ بلوچستان نا پوریا گر و کاروباری تپہ غاتے مون تروک ویل آتا ایسری کن ڈپٹی اسپیکر قومی اسمبلی قاسم خان سوری نا توسط اٹ سلابت نا عمل نا بناءِ کننگ ءُ ہرانا گچین ءُ نتیجہ اس دوبریک۔
