اسلام آباد۔ 24 دسمبر (اے پی پی) بنجائی وزیر اطلاعات و نشریات چوہدری فواد حسین پارینے کہ عمران خان قائداعظم نا ویژن ءِ مون آ درے و پوسکن آ پاکستان نا بنداو ءِ تخانے، داسہ ہندا بنداو آ ملک ءِ قائداعظم نا تغ انا تعبیر و ناقابل تسخیر جوڑ کننگ اُن، پاکستان نا پوسکن آ سفر بناکرینے، عدالتی فیصلہ غاتیان صاف و شفاف ریاست نا بیانہ مون آ ہِننگ ءِ ، دمدستی ادائیگی تا بابت آن ویل اف، آئی ایم ایف تون مریس وختی سوگوی کن ہیت وگپ کننگ اُن، ملکی معیشت گچینی نا کنڈا روان ءِ، داسکان تو نواز شریف و آصف علی زرداری نا بشخ ءِ ہم اوار مروئی ءِ، الس کس اسے نا غیر کانودی وڑاٹ جوڑکروک آمیرات آتا دفاع کن پیشن پیش تمپسہ، آصف علی زرداری و نواز شریف اسہ ٹھگ الائنس اس جوڑ کیر و ہمونا کیرغ آن تینا تحریک ءِ چلیفر، ننا موقف تو ہندائس کہ چنکا ایلم پبلک اکاؤنٹس کمیٹی نا چیئرمین جوڑ مرسا ہمہ بھلا ایلم نا ڈٹ آتا آڈٹ ءِ کننگ کیک ولے اسپیکر قومی اسمبلی فراخدلی نا درشانیءِ کرسا شہباز شریف ءِ چیئرمین جوڑ کننگ کن ہلا و داسہ ہرینہ کہ معاملہ ہمہ مون آ چلینگک۔ اوداہیت ءِ دوشنبے نادے آ لوک ورثہ ٹی قائد اعظم محمد علی جناح نا سال دے انا مناسبت اٹ قائداعظم نا زند انا سرحال آن عکسی نمائش اسے نا بنائی دود آن تران و صحافی تتون ہیت وگپ کرسا پارے۔ قائد اعظم نا زند انا بابت عکسی نمائش 28 دسمبر اسکان برجاسلک۔ دود اٹی ایگزیکٹو ڈائریکٹر لوک ورثہ شاہیرہ شاہد، پرنسپل انفارمیشن آفیسر (پی آئی او) میاں جہانگیر ، ایگزیکٹو ڈائریکٹر اے پی پی اختر منیر، چیف انفارمیشن کمشنر محمد اعظم تون اوار وزارت اطلاعات ونشریات نا بڑزکو کمامدارآک ساڑی ئسر۔ بنجائی وزیر اطلاعات و نشریات چوہدری فواد حسین دود آن تران کرسا پارے کہ لوک ورثہ ٹی قائداعظم نا زند انا بابت عکسی نمائش اٹی قائد اعظم نا ودی مننگ آن ہلیس اونا سیاسی جہد و قیام پاکستان اسکان نا غٹ عکس آک ساڑی ءُ۔ پوسکن آ چین اکن المی ءِ کہ او ضرور دا نمائش ءِ ہریر ہرا قائد اعظم محمد علی جناح نا شخصیت نا عکاس ءِ۔ اوپارے کہ سرسید احمد خان مسلمان تے پسماندہ و غلامی نا سوچ آن پیشن کشنگ کن تینا پبی کڑد ءِ ادا کرے، انگریزی و فارسی زبان تا جھیڑہ نا آڑاٹی مسلمان تے شونداری نا سفر آن توننگ کن سازش ءِ بے نقاب کرے و مسلمان تے بیدارکرے۔ اوپارے کہ قائد اعظم محمد علی جناح ءِ بناٹی اِرابھلو چیلنج مون تروک ئسر، اسہ چیلنج ہندوانہ شدت پسندی و ارٹ میکو مسلمان تے ٹی پسماندہ سوچ ئس۔ قائد اعظم محمد علی جناح دا چیلنج آتون مون تس، و اسہ پوسکن ءُ اسلامی ریاست اسے نا بنداو ءِ تخا۔ اوپارے کہ عمران خان نا دروشم اٹ اسہ لیڈر اس قائد اعظم نا ویژن ءِ مون آ درینے و پوسکن آ پاکستان نا بنداو ءِ تخانے۔ داسہ ہندا بنداو آ داسہ نن ماڑی جوڑ کننگ اُن۔ اوپارے کہ قائد اعظم محمد علی جناح تینا تران تے ٹی ہراگڑاتا ذکر ءِ کرے اوفتے ٹی وڈی خوری و اقرباء پروری سرفہرست ئسر۔ بنجائی وزیر پارے کہ اینو تاریخی ءُ دے اسے ، گدرینگوک آ دہائی تے ٹی وڈی خوری نا ہرا ریکارڈ ءِ جوڑ کننگانے اوفتیا عدالت آتا مریس عمل پورو مننگ ءِ۔ کل قوم خننگ ءِ کہ وڈی خوری نا کیس آک ایسرمننگ ءُ، کانود نا دزگیر آن پوسکن ءُ دور اسے نا بنامننگ ءِ۔ اوپارے کہ وڈی خوری نیزگاری ، تعلیم، جان جوڑی و ایلو السی خذمت نا بشخ آتون گنڈوک ءِ۔ ہراراج اٹی وڈی خوری و راجی ویل آک یکجا مریرہ او راج وخت اس ہم شون ہلنگ کپک۔ اوپارے کہ قائد اعظم محمد علی جناح نا سال دے انا وخت آ قوم ءِ باوری ترفک کہ عمران خان نا سرکڑدہ ہی ٹی نن ناقابل تسخیر پاکستان نا تغ انا تعبیر کننگ اُن۔ اسہ سوج اسے نا ورندی ٹی اوپارے کہ آصف علی زرداری و نواز شریف اسہ ٹھگ الائنس اس جوڑ کیر و ہمونا کیرغ آن تینا تحریک ءِ چلیفر ، داسہ الس سمجھدار مسنے، غٹ ءِ سماءِ کہ پیشن دیر اس ہراوڑ میرات جوڑ کرینے۔ اسہ سوج اسے نا ورندی ٹی چوہدری فواد حسین پارے کہ ننا موقف تو ہندا ئس کہ چنکا ایلم پبلک اکاؤنٹس کمیٹی نا چیئرمین جوڑ مرسا ہمہ بھلا ایلم نا ڈٹ آتا آڈٹ ءِ کننگ کیک ولے اسپیکر قومی اسمبلی فراخدلی نا درشانی ءِ کرسا شہباز شریف ءِ چیئرمین پبلک اکاؤنٹس کمیٹی جوڑ مننگ کن ہلا داسہ ہرینہ کہ معاملہ ہمہ مون آ چلینگک۔
