اسلام آباد۔ 24دسمبر (اے پی پی) وزیر خارجہ مخدوم شاہ محمود قریشی چار ملکی دورہ نا اولیکو مرحلہ ءِ سرسہبی اٹ پورو کننگ آن پد اوغانستا آن ایران آ رادہ مس۔ وزیر خارجہ تینا دورہ نا ارٹ میکو مرحلہ ٹی تہران اٹی بڑزکو ایرانی سرکڑدہ غاتون اہم اوڑدہی کیک۔ داکان مست او تینا چار ملکی دورہ نا اولیکو مرحلہ ٹی دوشنبے نا سہب اتون کابل آ سرمسوسس۔ دفترخارجہ نا رداٹ وزیر خارجہ اوغان صدر اشرف غنی تون اوڑدہی کرے، اوڑدہی ٹی تین پہ تینی است خواہی نا ہڑتوم آ کنڈآتا معاملہ و علاقائی و جہانی حالیت آتیا گپ و تران کننگا۔ سیکرٹری خارجہ تہمینہ جنجوعہ و وزارت خارجہ نا بڑزکو کمامدارآک ہم وزیر خارجہ تون اوار ئسر۔ داکان بیدس وزیر خارجہ تینا اوغان ہم منصب صلاح الدین ربانی تون ڈل انا کہول آ مذاکرات کرے۔ مذاکرات اٹی کڑدہ غاک تین پہ تینی است خواہی نا معاملہ، اوغانستان نا شونداری و شونہالی، اوغانستان اٹی امن وایمنی نا حالیت و مذاکراتی عمل تون اوار ہڑتوم آ ملک آتا واپاری و اقتصادی رابطہ غاتا مون آ دننگ آ گپ و تران کریر۔ وزیر خارجہ نا اوغانستان، ایران، چین و روس انا مسہ دے ئی دورہ نا مسخت دا ملک آتا بڑزکو سرکڑدہ غاتون پاکستان نا تین پہ تینی تعلقداری تیا خیال آتا درشانی ءِ کننگ نا ءِ تانکہ چندی بشخ آتے ٹی ہڑتوم آ کنڈآتا کمکاری ءِ پین سوگو کننگ مرے۔
