اسلام آباد۔ 24دسمبر (اے پی پی) سی پیک نا رداٹ بروک آ منہ سال اٹی پاکستان نا 80 درسد آبادی جہانی آب انا پوسکن انگا موٹروے تون منسلک مریک، کراچی، گوادر ، کوئٹہ ، لاہور، ملتان ،ڈیرہ اسماعیل خان ، اسلام آباد، کشمیر، پشاور ، ایبٹ آباد، گلگت ، قطبی علاقہ غاتون اوار ملک انا بھلا شار موٹروے تون گنڈنگ انگ آن روزگار نا پوسکن ءُ وارخواہی ودی مریک۔ سی پیک سیکرٹریٹ نا کمامدارآتارداٹ چین پاکستان اقتصادی راہداری نا رداٹ ڈیرہ اسماعیل خان ہکلہ موٹروے ، سکھر ملتان سیکشن ، ہزارہ موٹروے، سیالکوٹ لاہور سیکشن، گوادر اٹی ایسٹ بے ایکسپریس وے تون اوار ملک انا چندی شاہراہ تیا ترندی اٹ کاریم برجاءِ۔ 250 کلومیٹر ڈی آئی خان موٹروے چین پاکستان اقتصادی راہداری نا بشخ اسے۔ ڈٹ انا بروخت پوروی ءِ المی جوڑ کننگ کن ہکلہ ڈی آئی خان موٹروے ءِ پنچ بشخ اٹی بشخ وپانٹ کننگانے ہرافتے ٹی یارک رحمان خیل، رحمانی خیل کوٹ، بیلیاں ، کوٹ بیلیاں تراپ، تراپ پنڈی گھیپ و پنڈی گھیپ ہکلہ انٹرچینج اوار ءُ۔ دا ڈٹ 129 ارب روپئی نا خڑچ آن بروک آ سال مئی اسکان پورو مریک۔ موٹروے نا جوڑ کننگ آن ڈیرہ اسماعیل خان و بلوچستان اٹی واپاری و کاروباری سرجزآتے مون آ دننگک۔ اوفک پاریر کہ ہزارہ موٹروے آ تعمیراتی کاریم پبی وڑاٹ برجاءِ و اومیت ءِ کہ اینخو مالی سال انا آخیر اسکان پورو مریک۔ شاہ مقصود آن حویلیاں اسکان موٹروے لس ٹریفک کن ملوک ءِ ، ایبٹ آباد حویلیاں انٹرچینج اسکان ہزارہ موٹروے ءِ ٹریفک کن ملنگک وخت اس کہ ایلو بشخ زوت پورو مریک۔ داڈٹ انا پوروی آن ڈٹ انا تقدیر بدلینگک و داڑآن سیل و سوات ءِ ہم مون آ دننگک۔ ہنداوڑ سکھر ملتان موٹروے 392 کلومیٹر مئی 2019 ء ٹی پورو مریک۔
