تین پہ تینی است خواہی نا معاملہ، اوغانستان نا شونداری و شونہالی ، اوغانستان اٹی امن وایمنی نا حالیت و مذاکراتی عمل، تین پہ تینی واپاری و اقتصادی رابطہ غاتے مون آ دننگ آ گپ و تران کرے، ترجمان دفتر خارجہ
اسلام آباد۔ 24دسمبر (اے پی پی) وزیر خارجہ مخدوم شاہ محمود قریشی تینا مسہ دے ئی چار ملکی دورہ نا بناٹی دوشنبے نا سہب اتون کابل آ سرمس۔ او 24آن 26دسمبر 2018ء ٹی اوغانستان ، ایران، چین و روس انا دورہ ءِ کننگءِ۔ تینا بننگ آن پد وزیر خارجہ تینا اوغان ہم منصب صلاح الدین ربانی تون دارالحکومت کابل اٹی ڈل انا کہول آ مذاکرات کرے۔ دفترخارجہ نا ترجمان تینا ٹویٹ اٹی پارینے کہ مذاکرات نا وخت آ کڑدہ غاک تین پہ تینی است خواہی نا معاملہ، اوغانستان نا شونداری و شونہالی، اوغانستان اٹی امن وایمنی نا حالیت و مذاکرات نا عمل تون اوار ہڑتوم آ ملک آتا واپاری و اقتصادی رابطہ غاتا مون آ دننگ آ گپ و تران کریر۔ وزیر خارجہ تون اوار سیکرٹری خارجہ و وزارت خارجہ نا بڑزکو کمامدارآک ہم اریر۔ تینا دورہ ٹی وزیر خارجہ دا ملک آتا بڑزکو سرکڑدہ غاتون پاکستان نا تین پہ تینی تعلقداری تے مون آ دننگ آ مذاکرات کیک ہراڑآن چندی بشخ آتے ٹی ہڑتوم آ کنڈآتا کمکاری ٹی ودکی بریک۔ تین پہ تینی کمکاری ءِ مون آ دننگ نا اہم معاملہ غاتون اوار اوار تینا دورہ ٹی وزیر خارجہ ترندی اٹ بدلینگوک آ علاقائی و جہانی حالیت آتیا ہم داملک آتا سرکڑدہ غاتون ہیت وگپ کیک وخت اس کہ اوڑدہی تے ٹی اوغانستان اٹی امن و مذاکرات نا ساڑی آ کوشست آتیا ہم گپ و تران کننگک۔
