اسلام آباد۔ 24دسمبر (اے پی پی) وزیر خارجہ شاہ محمود قریشی پارینے کہ پاکستان تینا ہمسایہ ملک آتون گچین تعلقداری، ڈیہہ نا شونداری شونہالی و امن نا خواہش مند ءِ۔ دوشنبے نادے آ تینا مسہ دے ئی دورہ غا رادہ مننگ آن مست پاکستان ٹیلی ویژن تون خصوصی ہیت وگپ اٹی اوپارے کہ علاقائی ملک آتون خڑکی سیاسی و واپاری تعلقداری تا قیام پاکستان تحریک انصاف نا حکومت نا اولیت آتے ٹی اوار ءِ۔ اوپارے کہ پاکستان اسہ امن پسند ءُ ملک اسے و او ایلو ملک آک خاص کر ہمسایہ ملک آتون دوستانہ تعلقداری نا پالیسی آ مدام عمل کرینے۔ اوپارے کہ پاکستان غٹ ہمسایہ ملک آتون گچین تعلقداری خواہک و پاکستان مدام جھیڑہ غاتا چٹفنگ کن مذاکرات آزور شاغانے۔ اوتینا دورہ اوغانستان ، ایران ، چین و روس ءِ مون آ تخسا پارے کہ او پاکستان تون دا ملک آتا ہڑتوم آکنڈآتا تعلقداری تے مون آ دننگ و سوگوی آ خیال آتا درشانی ءِ کینہ۔ اومستی پارے کہ داوخت آ علاقائی امن و سلامتی تون اوار اوار اوغانستان اٹی امن وایمنی نا معاملہ غاتیا ہم خیال آتا درشانی ءِ کننگک۔ اوپارے کہ پاکستان اوغانستان نا امن کن گام گیج کننگ کن پرعزم ءِ۔ اوداہیت آخصوصی زور شاغا کہ ہمسایہ ملک آتا واپاری تعلقداری تے سوگو کننگ نا گرج ءِ۔ اوپارے کہ پاکستان تحریک انصاف نا حکومت ملک ءِ مون تروک ویل آتا ایسری کن مخلصانہ کوشست کننگ ءِ تانکہ ملک ءِ تنکی تیان کشنگ مرے۔
