وزیر خارجہ مخدوم شاہ محمود قریشی نا اوغان صدر اشرف غنی تون اوڑدہی، اوغان ہم منصب صلاح الدین ربانی تون ڈل انا کہول آ مذاکرات
اسلام آباد۔ 24دسمبر (اے پی پی) وزیر خارجہ مخدوم شاہ محمود قریشی اوغان صدر اشرف غنی تون دوشنبے نادے آ کابل اٹی اوڑدہی کرینے۔ او تینا چار ملکی دورہ نا اولیکو مرحلہ ٹی دوشنبے نا سہب اتون کابل آ سرمس۔ دفترخارجہ نا ترجمان تینا ٹویٹ اٹی پارینے کہ اوڑدہی ٹی وزیر خارجہ مخدوم شاہ محمود قریشی تون اوار سیکرٹری خارجہ تہمینہ جنجوعہ و وزارت خارجہ نا بڑزکو کمامدارآک ہم ساڑی ئسر۔ داوخت آ تین پہ تینی است خواہی نا معاملہ و قومی و علاقائی حالیت آتیا گپ و تران کننگا۔ وزیر خارجہ دوشنبے نا سہب اوغانستان، ایران، چین و روس انا مسہ دے ئی دورہ کن دوشنبے نا سہب اتون اسلام آباد آن رادہ مسوسس ہرانا مسخت دا ملک آتا بڑزکو سرکڑدہ غاتون پاکستان نا تین پہ تینی تعلقداری تیا خیال آتا درشانی ئس تانکہ چندی بشخ آتے ٹی ہڑتوم آ کنڈآتا کمکاری ءِ پین سوگو کننگ مرے۔ داکان مست وزیر خارجہ تینا اوغان ہم منصب صلاح الدین ربانی تون ڈل انا کہول آ مذاکرات کرے۔ مذاکرات نا وخت آ کڑدہ غاک تین پہ تینی است خواہی نا معاملہ، اوغانستان نا شونداری و شونہالی ، اوغانستان اٹی امن وایمنی نا حالیت و مذاکرات نا عمل تون اوار ہڑتوم آ ملک آتا واپاری و اقتصادی رابطہ غاتا مون آدننگ آ گپ وتران کریر۔دفترخارجہ نا بیان نا رداٹ تینا دورہ ٹی وزیر خارجہ دا ملک آتا بڑزکو سرکڑدہ غاتون پاکستان نا تین پہ تینی تعلقداری تے مون آ دننگ آ مذاکرات کیرہ ہراڑآن چندی بشخ آتے ٹی ہڑتوم آ کنڈآتا کمکاری ٹی ودکی بریک۔ تین پہ تینی کمکاری ءِ مون آ دننگ نا اہم معاملہ غاتون اوار اوار تینا دورہ ٹی وزیر خارجہ ترندی اٹ بدلینگوک آ علاقائی و جہانی حالیت آتیا ہم دا ملک آتا سرکڑدہ غاتون ہیت وگپ کیک وخت اس کہ اوڑدہی تے ٹی اوغانستان اٹی امن و مذاکرات نا ساڑی آ کوشست آتیا ہم خیال آتا درشانی ءِ کننگک۔ وزیراعظم عمران خان نا وژن آ عملدرآمد نا رداٹ پاکستان تینا ہمسایہ و ڈیہہ نا ایلو ملک آتون تین پہ تینی تعلقداری تے ٹی ودکی و سوگوی نا خواہش مند ءِ تانکہ علاقائی کمکاری و خاص کر خلقت تون رابطہ و اقتصادی رابطہ غاتے مون آ دننگ مرے۔آ
