بیجنگ۔ 21 دسمبر (اے پی پی) بنجائی وزیر ڈٹ بندی، شونداری ، اصلاحات و شماریات مخدوم خسرو بختیار پارینے کہ پائیدار معاشی شونداری ءِ المی جوڑ کننگ کن اقتصادی زون تا جوڑ کننگ کن کوشست آک برجاءُ، گوادر ءِ مچ آ ڈیہہ کن معاشی مرکز اس جوڑ کننگ اُن، گوادر اٹی پیٹروکیمیکل کمپلیکس دا کوریڈور ءِ پوسکن ءُ جہت اس ایتک، کشت وکشار نا شونداری کن چینی آزموندہ غاتیان ہر وڑ فائدہ ہرفنگ کن کاریم برجاءِ ۔ داخیال آتا درشانی ءِ او جمعہ نادے آ بیجنگ اٹی چینی ڈویلپمنٹ ریسرچ سنٹر آف اسٹیٹ کونسل نا دورہ ٹی پارے۔ چیئرمین بورڈ آف انوسٹمنٹ ہارون شریف، پاکستانی سفیر مسعود خالد و پروجیکٹ ڈائریکٹر حسن داؤد ئسک ہم اوڑتون اوار ئسر۔ بنجائی وزیر مخدوم خسرو بختیار پارے کہ سی پیک بیلٹ اینڈ روڈ انا غٹ آن اہم ءُ ڈٹ اسے، سی پیک نا اولیکو مرحلہ ٹی توانائی نا کمتی ءِ پور و کننگ کن زرکاری مس، بجلی تون اوار اوار کشت وکشار، صنعتی شونداری و ایلو بشخ آتے ٹی کمکاری آ چکار کننگ انگ ءِ۔ اوپارے کہ پائیدار معاشی شونداری ءِ المی جوڑ کننگ کن اقتصادی زون تا جوڑ کننگ کن کوشست آک برجاءُ۔ گوادر ءِ مچ آ ڈیہہ کن معاشی مرکز اس جوڑ کننگ اُن۔ اوپارے کہ گوادر اٹی پیٹروکیمیکل کمپلیکس داکوریڈور ءِ پوسکن ءُ جہت اس ایتک۔ بنجائی وزیر پارے کہ پاکستان ءِ درآمد و برآمد آتے ٹی بریبری اتوئی مریک، چینی صنعت آتا پاکستان گدریفنگ و اقتصادی زون تا آبادی آ چکار کننگ ءِ۔ اوپارے کہ درملکی زرکاری ءِ پاکستان آ اتنگ کن سازگار چاگڑد اس ودی کننگ کن گام گیج کننگ اُن۔ صنعت آتا جوڑکننگ کن پلانٹ آن ہیو انڈسٹری نا کنڈاہنوئی مریک۔ اوپارے کہ ٹیکنالوجی نا گدریفنگ تون اوار اوار علم انا منتقلی کن ہم کوشست کروئی مریک۔ پاک چین ریسرچ سنٹر نا نیام اٹ رابطہ غاتے استوار کننگ نا سخت ضرورت ءِ۔
