اسلام آباد۔ 21 دسمبر (اے پی پی) وزیر مملکت ریونیو حماد اظہر پارینے کہ 29 ملک آتے ٹی پاکستانی تا یک و نیم لکھ اکاؤنٹ آتے ٹی 10 آن 11 ارب ڈالر مننگ کیک، سوئٹزرلینڈ اٹی 200 ارب ڈالر ساڑی مننگ نا ہیت ءِ مسکوہی وزیر خزانہ اسحاق ڈار 2013ء ٹی اسمبلی ٹی کریسس، سوئٹزرلینڈ اتون مہالو معاہدہ پورو الوکہ ، داسہ نن معاہدہ ءِ پورو کرینن، جنوری آن سوئس اکاؤنٹ آتا بابت سرجم احوال آتا بننگ بناکیک۔ جمعہ نا دے ایوان بالا ٹی وقفہ سوج آتے ٹی سینیٹر مشتاق احمد و سینیٹر جاوید عباسی نا سوج آتا ورندی ٹی اوپارے کہ مسکوہی حکومت نا دور اٹی سوئٹزرلینڈ اتون اسہ معاہدہ اس کننگاسس ہرادوہرہ خراج و تعلقدار گڑاتا بابت ئس ولے اوٹی اکاؤنٹ آتا سرجم احوال آتا معاملہ اوار الوکہ، ساڑی حکومت دُوارہ داڑآ مذاکرات کرے و معاہدہ ءِ پورو کرینے، جنوری ٹی دا چرجوئی ٹی پیش رفت مریک، 29 ملک آتا حساب وکتاب مون آ بسنے، یک و نیم لکھ اکاؤنٹ آتے ٹی 10 آن 11ارب ڈالر مننگ کیک۔ اوپارے کہ مسکوہی وزیر خزانہ اسحاق ڈار 2013ء ٹی قومی اسمبلی ٹی سوئس بینک آتے ٹی پاکستانی تا دوسد ارب ڈدالر نا ساڑی گری نا ہیت ءِ کریسس۔ اوپارے کہ سوئس اکاؤنٹ آتا سرجم احوال آک مون آبننگ آن پد معلوم مریک کہ ہرااکاؤنٹ آک خراج گوشوارہ غاتے ٹی ظاہر کننگانو و ہرافک آخا، اوکان پد ہی دا بابت کارروائی اس مننگ کیک۔
