اسلام آباد۔ 21دسمبر (اے پی پی) بنجائی وزیر انسانی حق شیریں مزاری پارینے کہ میرات آتے ٹی نیاڑی تا بشخ انا بابت ویل آتا ایسری کن ہیلپ لین اس جوڑ کننگانے، نیاڑی تا اِراکانود تون اوار انسانی حق انا 9 کانود ایوان اٹی ایسونن۔ جمعہ نادے آ قومی اسمبلی ٹی وقفہ سوج آتے ٹی شاہدہ رحمانی نا سوج انا ورندی ٹی بنجائی وزیر انسانی حق شیریں مزاری پارے کہ نیاڑی تا حق انا بابت آن مون نا حکومت آک ہچ اس کتنو۔ نیاڑی تے اوفتاحق بھلو وخت اسے آن ملنگ پننگ ءِ۔ نن 9 کانود گدریفینن ہرافتیان اِرٹ نیاڑی تا بابت ءُ۔ نجی آرگنائزیشن نا ڈیٹا غلط ءِ۔ داڑآن ایوان ءِ معلومدار کیوہ۔ میرات اٹی نیاڑی تا بشخ انا بابت ویل آتا ایسری کن ہیلپ لین اس جوڑ کننگانے ۔ طاہرہ اورنگزیب نا سوج انا ورندی ٹی اوپارے کہ ہرادارہ ٹی معذور بندغ آتے کن ریمپ اس بایدے مرے و اے ٹی ایم مشین تے معذور بندغ آتے کن پیڈ فرینڈلی جوڑ کننگک تانکہ اوفتے کن آسانی ودی مننگ کے۔
