اسلام آباد۔ 21 دسمبر (اے پی پی) بنجائی وزیر توانائی عمر ایوب خان پارینے کہ بجلی دُزی، اووربلنگ و ٹاسفارم آتے رزاک اٹ خراب کننگ نا توننگ کن گام گیج کننگ انگ ءِ، چندی معاملہ غاتے ٹی اوار مننگ آ 250 آفیسر آتے اینک ، 1200 ملازم آتیا مقدمہ درج کرفسا اوفتے جیل آتیا گدریفنگانے۔ فاٹا، چترال وایلو علاقہ غاتے ٹی بجلی نا ترسیل و فراوانی ءِ گچین جوڑ کننگک، صارف آک ہرافتیا ڈی ٹیکشن بل شاغنگک اگہ او بل غلط ءِ تو براہ راست چیف ایگزیکٹو ءِ لکھر تو اوڑآ کارروائی کینہ۔ جمعہ نادے آ قومی اسمبلی ٹی وقفہ سوج آتے ٹی مسرت رفیق مہیسڑ نا سوج انا ورندی ٹی بنجائی وزیر پارے کہ 250 آفیسر آتے چندی سوب آتیا اینک 1200 نا برخلاف ایف آئی آر درج کرسا اوفتے جیل آتیا گدریفنگانے۔ اوپارے کہ چانک کلچر ءِ چٹفسا بجلی نا فراوانی ءِ ہم المی جوڑ کننگ انگ ءِ ، ننے اواری اٹ ویل آتے ایسر کروئی ءِ۔ صلاح الدین نا ضمنی سوج آ بنجائی وزیر پارے کہ صارف آک ہرافتیا ڈی ٹیکشن بل شاغنگک اگہ او بل غلط ءِ تو براہ راست چیف ایگزیکٹو ءِ نوشتہ کیر تو اوڑآ کارروائی کینہ۔ اوپارے کہ گڑاس میٹر آتا تہہ ٹی ٹمپرنگ کننگک اوڑآ ڈی ٹیکشن بل گدریفنگک۔ داکلچر ءِ چٹفنگ کن گام گیج کننگ انگ ءِ۔
