اسلام آباد۔ 21 دسمبر (اے پی پی) وزیر مملکت داخلہ شہریار آفریدی پارینے کہ مستین اٹی تعلیمی ادارہ غاتے ٹی قدرتی آفت آتون مون تننگ نا تربیت تننگاکہ نن داپروگرام نا دُوارہ بناءِ کینہ، ہراسٹ کانود ءِ شرف ایتک اودے شرف ملک، خلاف ورزی کروک آتون کانود نا رداٹ مون تننگک۔ پوسکن آ پاکستان اٹی کانود نا بالادستی برجاسلک۔ داخیال آتا درشانی ءِ او جمعہ نادے آ نیشنل انسٹیٹیوٹ آف فائر ٹیکنالوجی نا کنڈآن سند آتا بشخ و پانٹ نا دود آن تران کرسا کرے۔ وزیر مملکت پارے کہ کانود غٹ اکن بریبر ءِ ، مہالو دا تاثر ئس کہ پاکستان اٹی ہروڑچلینگک ، داسہ دُن مفک، ہراسٹ اخس کہ واکدار مریک اونا برخلاف کانود نا رداٹ کارروائی مریک۔ اوپارے کہ اینو پگہ اسہ ٹرینڈ اس جوڑ مسنے کہ ماڑی اسے ٹی خاخر لگک و ولدا پاننگ کہ مچ آ ریکارڈ ہشنگا، دامعاملہ نا نوٹس ءِ ہلکونن و غٹ تر ڈیٹا تے دوئی کننگ اُن ہرافتے زوت الس نا مون آ اتینہ۔ وزیر مملکت داخلہ پارے کہ قرآن نا تعلیم انسانیت نا سبخ ایتک۔ اینو نن ہرادود اٹی ساڑی اُن داڑے ہم انسانیت نا خذمت نا تربیت تننگانے۔ اوپارے کہ مستین اٹی تعلیمی ادارہ غاتے ٹی قدرتی آفت آتون مون تننگ نا تربیت تننگاکہ و دانا نمبر ہم تننگاکہ، نن دا تربیت ءِ دُوارہ بناکینہ۔ وزیر مملکت پارے کہ شون ہلوک آ ملک آتے ٹی ورناچین و خاص کر طالب علم آتیا خصوصی چکار کننگک۔ وزیر مملکت پارے کہ نیشنل انسٹیٹیو ٹ آف فائر ٹیکنالوجی ءِ انت کہ ازباب اس درکار مریک اوفتے تون اوار غٹ المی آسراتی تے فراوان کینہ۔ وزیر مملکت پارے کہ انسانیت نا خذمت ہرا ننا خاص ئس او دے اینو ننے دنیا پاننگ ءِ۔ اگہ نم تاریخ ءِ خوانبو تو معلوم مریک کہ غزوات اٹی حضرت ﷺ نا شانہ بشانہ چناک ہم حصہ ہلکرہ ۔ وزیر مملکت پارے کہ دہشت گردی نا برخلاف جنگ اٹی 70 ہزار آن زیات جان تا قربانی تسونن و بھلو مالی نسخان اس ہم ہرفینن۔ وزیر مملکت پارے کہ نیشنل ایکشن پلان نا رداٹ نن بھاز انگا سرسہبی تے دوئی کرینن۔ مچ آ دنیا نا ملک آک اینو ورنانسل آ چکار کننگ ءُ ، ننے ہم بروک آ چین تا آخبت ءِ رکھ جوڑ کننگ نا گرج ءِ ۔ شہریار آفریدی پارے کہ کنے خوشی ءِ کہ پاک فوج، ایئر فورس، نیوی رینجرز، پولیس تون اوار ایلو ادارہ غاتا بندغ آتے ٹریننگ تننگانے۔ اوپارے کہ دا شعبہ ءِ نم تینا مرضی اٹ گچین کرینورے ، نم مصیبت نا وخت و مشکل اٹی ایلوفتے کن سلرہ۔ شہریار آفریدی پارے کہ نااومیدی کفر و گناہ ءِ۔ آخبت ننا ءِ، نن اسہ عظیم ءُ قوم اس جوڑ مننگ اُن، ہراتم خالق تون تعلق مریک تو دنیا نا بھلا بھلا آزمائش آک حل مریرہ۔ دود اٹی نمان کارکڑد نشان تروک آتے ٹی سند ہم بشخ وپانٹ کننگا۔
