مسہ ارب ڈالر اسٹیٹ بینک آف پاکستان ءِ گدریفنگک، ابوظہبی نا فنڈ شونداری نا جاری پڑو
وزیراعظم عمران خان آزمائش نا وخت آ پاکستان نا کمکاری آ یو اے ای نا منت واری ءِ ہرفے
اسلام آباد /ابوظہبی۔ 21 دسمبر (اے پی پی) متحدہ عرب امارات پاکستان ءِ مسہ ارب ڈالر نا مالی کمک فراوان کننگ نا فیصلہ ءِ کرینے وخت اس کہ متحدہ عرب امارات نا داپڑو آن پد وزیراعظم عمران خان آزمائش نا وخت اٹی پاکستان نا فراخدلی اٹ کمکاری آ یو اے ای نا منت واری ءِ ہرفینے۔ابوظہبی نا فنڈ شونداری آن جاری پڑو نا رداٹ مسہ ارب ڈالر ءِ اسٹیٹ بینک آ ف پاکستان ءِ گدریفنگک ہرانا مسخت پاکستان ءِ مالی کمک فراوان کننگ نا ءِ۔ متحدہ عرب امارات نا خبر رساں ادارہ ’’وام‘‘ نا رداٹ بروک آ دے تیٹی داپیسہ غاتے گدریفنگک ہراڑآن پاکستان ءِ زرمبادلہ نا کوڑی تے گچین جوڑ کننگ اٹ کمک رسینگک۔ بیان اٹی پاننگانے کہ دامالی کمکاری نا فیصلہ ءِ ہڑتوم آ برادر ملک آتا دیرینہ تعلقداری و تاریخی السی کمکاری ءِ مون آ تخسا کننگانے۔ دا تعلقداری و کمکاری ءِ پین بشخ آتے ٹی ہم مون آ دننگک۔ ابوظہبی فنڈ مست ہم پاکستان اٹی توانائی ، جان جوڑی ، تعلیم و انفراسٹرکچر بشخ انا 8 شونداری ڈٹ آتے کن یک و نیم ارب درہم فراوان کرینے۔ داٹی 93 کروڑ درہم گرانٹ نا حالت اٹ تسنے۔ داکان بیدس وزیراعظم عمران خان آزمائش نا وخت اٹی پاکستان نا فراخدلی اٹ کمکاری آ متحدہ عرب امارات نا حکومت نا منت واری ءِ ہرفینے۔ جمعہ نا دے تینا ٹویٹ اٹی وزیراعظم پارے کہ داگام گیج برس ہابرس آ محیط ننا پائیدار سنگتی و عزم انا عکاس ءِ۔
