اسلام آباد۔ 20 دسمبر (اے پی پی) وزیراعظم عمران خان پارینے کہ پاکستان ترکی تون تینا تعلقداری تے بھاز اہمیت ایتک و پاکستان نا الس صدر رجب طیب اردوان نا بھاز شرف ءِ کیک۔ اوداہیت ءِ ترکی نا وزیر قومی دفاع جنرل (ر) ہولوسی اکار تون ہیت وگپ کرسا پارے ہرا پنچ شنبے نادے آ داڑے وزیراعظم آفس اٹی اوڑتون اوڑدہی کرے۔ وزیر دفاع پرویز خٹک ہم داوخت آ ساڑی ئس۔ وزیراعظم عمران خان پارے کہ نن صدر اردوان نا بصیرت انگیز سرکڑدہ ہی ٹی ترکی نا راجی و اقتصادی شونداری نا مداح اُن۔ پاک۔ترک تعلقداری تے مون آدننگ آ است جمی نا درشانی ءِ کرسا وزیراعظم پارے کہ پاکستان واپار و دفاعی کمکاری تون اوار غٹ بشخ آتے ٹی تین پہ تینی کمکاری ءِ پین مون آ دننگ نا خواہندار ءِ۔ جنرل (ر) ہولوسی اکار وزیراعظم ءِ وزارت عظمیٰ نا منصب ءِ سنبھالنگ آ مبارکبادی تس و صدر رجب طیب اردوان نا کنڈآن نیک است خواہی تے سرکرے۔ اوپارے کہ ترک سرکڑدہ وزیراعظم نا ترکی نا دورہ نا چاری ءِ ہراڑآن ہڑتوم آ ملک آتا نیام اٹ تعلقداری تے پین سوگو ی ملک۔ اودہشت گردی نا برخلاف جنگ اٹی پاکستان نا کوشست و قربانی تا ستاءِ کرے ۔ اوڑدہی ٹی علاقائی حالیت آتیا ہم گپ و تران مس۔
