اسلام آباد۔ 20 دسمبر (اے پی پی) پریسٹن یونیورسٹی و سوسائٹی آف گلوبل سولائزیشن نا کنڈآن موریطانیہ و پاکستان نا نیام اٹ ’’واپار و سیل و سوات‘‘ آ گیسٹ لیکچر نا بست و بند کننگا۔ پاکستان اٹی موریطانیہ نا ہائی کمشنر راشد علی صوبیدار مہمان خاص و گیسٹ اسپیکر ئس۔ دود اٹی ایس جی سی و سینئر استادآک، پریسٹن یونیورسٹی نا انتظامیہ و طالب علم آک ساڑی ئسر۔ دود اٹی پاکستان اٹی سری لنکا نا ہائی کمشنر نوردین محمد شہید ہم اوار ئس۔ پاکستان اٹی ماریطانیہ نا ہائی کمشنر راشد علی صوبیدار مہمان خاص و گیسٹ اسپیکر ناوڑاٹ تینا تران اٹی پاکستان و موریطانیہ نا نیام اٹ واپاری و سیل و سواتی معاملہ غاتیا تینا خیال آتا درشانی ءِ کرسا پارے کہ ہڑتوم آ برادر ملک آتا نیام اٹ واپاری و سیل و سواتی کچ اٹی کیہی گناودکی مننگ کیک۔ اوزور شاغسا پارے کہ ہڑتوم آ برادر ملک آتا نیام اٹ تین پہ تینی تعلقداری تے مون آ دننگ کن اقتصادی بشخ اٹی کمکاری المی ءِ۔ اومستی پارے کہ ہڑتوم آ برادر ملک آتا نیام اٹ آزادانہ واپار ہڑتوم آ ملک آتا فائدہ ٹی ءِ۔ موریطانیہ نا تاریخ آ تینا گونڈ ءُ ہیت اسے ٹی اوپارے کہ موریطانیہ نا ریاست اسہ جزیرہ سے آ تالان ءِ ہرانا آبادی 1.2 ملین ءِ۔ اوپارے کہ 1968 ء ٹی آزادی نا وخت اونا ملک جی ڈی پی ٹی 200 ڈالر آن 1100 ڈالر اسکان ودکی کرینے۔ 2030 ء اسکان نن تینا پیدوار ءِ 20,000 ڈالر اسکان دننگ خوانہ۔ اوتینا ملک انا راجی ، دودوربیدگی و تاریخی پلو آتا ذکر ءِ کرسا پارے کہ ملک اٹی خواندگی نا کچ 100 درسد ءِ و کالج نا کہول اسکان تعلیم مفت ءِ۔ آخیر اٹی ڈاکٹر عبدالباسط چانسلر پریسٹن یونیورسٹی پاکستان اٹی ماریطانیہ نا ہائی کمشنر راشد علی صوبیدار مہمان خاص و گیسٹ اسپیکر ءِ پریسٹن یونیورسٹی نا شیلڈ اس پیش کرے۔
