کوئٹہ۔ 18 دسمبر (اے پی پی) جماعت اسلامی نا بنجائی امیر سینیٹر سراج الحق پارینے کہ حکومت نا برخلاف ہچ ءُ تحریک اسے ٹی بشخ ہلپنہ، حکومت الس نا بنداوی ویل آتاایسری کن گام گیج چست کے، حکمران تے پارلیمنٹ نا فلور آ اوفتا الیکشن مہم اٹی الس تون کروک آ وعدہ غاتے یات ترفسا کینہ، جماعت اسلامی پاناما لیکس نا 436بندغ نا برخلاف بے پرخ کارروائی نا خواست ءِ کیک، داخیال آتا درشانی ءِ او سے شنبے نادے آ پریس کانفرنس آن تران کرسا کرے، داوخت آ جماعت اسلامی نا صوبائی امیر عبدالحق ہاشمی، ولی شاکر تون اوار ایلو راہشونک ہم ساڑی ئسر، سینیٹر سراج الحق پارے کہ بلوچستان قدرتی معدنیات آتیان مالامال ءُ صوبہ اسے ، ولے بلوچستان نا الس اینو ہم بنداوی ویل آتا گواچی ءِ، بے روزگاری نا سوب ورناک مایوسی نا گواچی ءُ، اینو ہم کوئٹہ ٹی دیر ، بجلی و گیس کون آ ویل آتا سوب الس روڈ آتیا برانز کننگ ءُ صوبائی حکومت الس نا ویل آتا ایسری کن گام گیج چست کے۔ اوپارے کہ مسکوہی صدر پرویز مشرف نا دور اٹی کوئٹہ شار ءِ دیر انا فراوانی کن 8 ارب روپئی تننگا ولے بدقسمتی اٹ او خڑچ مننگ نا جاگہ غا وڈی خوری نا گواچی مسر نیب دانا جاست وپاست ءِ کے تانکہ کوئٹہ نا الس ءِ کنوئی ءُ صاف دیر انا فراوانی ءِ المی جوڑ کننگ مرے، اوپارے کہ بدقسمتی اٹ قومی اسمبلی ٹی اقلیتی باسک شراب نا برخلاف بل اس پیش کرے ہرا اکثریت ملپننگ نا سوب منظور مننگ کتو، اسہ سوج اسے نا ورندی ٹی اوپارے کہ وزیراعظم پاکستان عمران خان پاکستان ءِ مدینہ نا وڑاٹ فلاحی ریاست اس جوڑ کننگ نا پڑو ءِ کریسس ہرانا جماعت اسلامی تون اوار مذہبی جماعت آک ستاءِ کریر ولے 4 تُو گدرینگ انگ نا باوجود ہچ ءُ عملی گام گیج اس نظر بفننگ ءِ، اسہ پین سوج اسے نا ورندی ٹی جماعت اسلامی نا بنجائی امیر پارے کہ سی پیک ڈٹ اٹی بلوچستان نا ڈٹ آتے کشنگانے ہرافتے حکومت پاکستان دمدستی وڑاٹ پدی اوار کے تانکہ بلوچستان شونداری نا کسر آ روان مرے، اومستی پارے کہ حکومت نا برخلاف اپوزیشن نا کنڈآن ہچ ءُ تحریک اس کنا علم اٹی اف، کشمیر نا بابت چست کروک آ سوج انا ورندی ٹی سینیٹر سراج الحق پارے کہ داوخت آ کشمیری سرکڑدہ غاتے پابند سلاسل کننگانے 3پی ایچ ڈی پروفیسر آتے ساڑی ہی ٹی شہید کننگانے، بھارت زیات ہرے اسکان کشمیر نا توار ءِ توننگ کپک داسہ وخت ءِ کہ جہانی دنیا مظلوم کشمیری تے حق خودارادیت تننگ کن گام گیج چست کے۔
