بلوچستان نیشنل پارٹی (مینگل) متحدہ مجلس عمل نا اومیت دار ولی محمد ترابی نا مخ تفی ٹی اومیت دار ملک غلام مصطفی شاہوانی ءِ دزکش کرینے، بی این پی نا پارلیمانی راہشون ملک نصیر احمد شاہوانی نا کوئٹہ ٹی پریس کانفرنس آن تران

کوئٹہ۔ 18 دسمبر (اے پی پی) بلوچستان اسمبلی ٹی بلوچستان نیشنل پارٹی (مینگل) نا پارلیمانی راہشون ملک نصیر احمد شاہوانی پارینے کہ بی این پی (مینگل) تین پہ تینی سلابت آن پد حلقہ پی بی 26کوئٹہ III آن متحدہ مجلس عمل نا اومیت دار مولانا ولی ترابی نا حق اٹی تینا اومیت دار ملک غلام مصطفی شاہوانی ءِ دزکش کرسا اونا مخ تفی نا پڑو ءِ کرے، داخیال آتا درشانی ءِ او سے شنبے نادے آ جے یو آئی و بی این پی مینگل نا اسیجا پریس کانفرنس آن تران کرسا کرے۔ داوخت آ بلوچستان اسمبلی ٹی اپوزیشن راہشون ملک سکندر خان ایڈووکیٹ، مسکوہی سینیٹر حافظ حمد اللہ و پی بی 26 آن دزکش مروک آ بی این پی نا اومیت دار ملک غلام مصطفی شاہوانی ئسک ہم ساڑی ئسر۔ بلوچستان نیشنل پارٹی نا پارلیمانی راہشون ملک نصیر احمد شاہوانی پارے کہ ننا جمعیت علماء اسلام تون سیوت پوسکن ءُ ہیت اس اف داکان مست ہم سیوتی ئسن و مرینہ، اوپارے کہ مولانا ولی ترابی اپوزیشن نا امنائی اومیت دار مریک، اوداعزم انا درشانی ءِ کرے کہ 31دسمبر 2018 ء آ انشاء اللہ مولانا ولی ترابی ہی سرسہب مریک ، ملک سکندر خان ایڈووکیٹ پارینے کہ اپوزیشن نا غٹ جماعت آک اواری اٹ الیکشن کمپئین ءِ چلیفرہ و 31دسمبر نا ضمنی گچین کاری ٹی اپوزیشن نا امنائی اومیت دار مولانا ولی ترابی نا سرسہبی نا دے مریک۔ یات سلے کہ مولانا ولی ترابی اپوزیشن نا ایلوجماعت آک پاکستان مسلم لیگ (ن) ، پشتونخواملی عوامی پارٹی و بلوچستان نیشنل پارٹی (مینگل) نا امنائی اومیت دار نا حیثیت اٹ ضمنی گچین کاری ٹی بشخ ہلیک۔