اقوام متحدہ۔ 18 دسمبر (اے پی پی) اقوام متحدہ نا جنرل اسمبلی حق خودارادیت تننگ و درملکی کوزہ نا چٹفنگ نا پاکستان نا پیش کروک قرارداد ءِ امنائی وڑاٹ منظور کرے۔ قرارداد اٹی قوم تے حق خودارادیت تننگ ءِ المی جوڑ کننگ نا عزم انا اعادہ ءِ کرسا ملک آتیان ایلو ملک و علاقہ غاتیا کوزہ، اوفتے ٹی فوجی نیام تمنگ، جبر، امتیاز و بدسلوکی نا گام گیج آتے دمدستی وڑاٹ بند کننگ نا خواست ءِ کننگانے۔ پاکستان نا سپانسر کروک دا قرارداد ءِ 193 باسکی جنرل اسمبلی ٹی ریکارڈ 83ملک آک سپانسر کریر۔ داکان مست دا قرارداد جنرل اسمبلی نا راجی انسانی و دودوربیدگی معاملہ غاتا بابت مسٹ میکو کمیٹی امنائی وڑاٹ منظور کریسس۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی داوخت آ ’’اے پی پی‘‘ ءِ ٹیلی فون انٹرویو اسے ٹی پارے کہ دا قرارداد اٹی بے پرخ و المی وڑاٹ مقبوضہ جموں و کشمیر و مقبوضہ فلسطین نا شاری تتون اوار مچ آ دنیا نا خلقت کن حق خودارادیت ءِ اوفتا ناقابل تنسیخ حق امنا کننگانے۔
