اسلام آباد۔ 18 دسمبر (اے پی پی) وزیر مملکت موسمیاتی بدلی زرتاج گل وزیر پارینے کہ وزیراعظم عمران خان نا سرکڑدہ ہی ٹی ہندن ءُ مثالی ءُ کاریم اس کرسا کانہ کہ بروک آ حکومت ہم پاکستان تحریک انصاف نا ہی مریک، باصلاحیت ورناک ننا ملک انا نہادی سرمایہ غاک ءُ، قدرت پاکستان ءِ غٹ قدرتی وسیلہ غاتے تسنے ہرافتا نن بایدے قدر ءِ کین۔ داخیال آتا درشانی ءِ او سے شنبے نا دے آ نیشنل ہارٹیکلچرل سوسائٹی آف پاکستان نا کنڈآن 39 می سالانہ پھل آتا نمائش ءِ کٹوک آتے ٹی انعام آتا بشخ وپانٹ نا دود آن تران کرسا کرے۔ زرتاج گل پارے کہ زند اٹی ہچ ءُ کاریم اس مشکل مفک ، داڑکن پکا ارادہ ولگن نا ضرورت ءِ۔ ہراتم ای پنجاب نا پسماندہ ضلع ٹی پاکستان تحریک انصاف نا پلیٹ فارم آن سیاست نا بناءِ کریٹ تو کنے بے شمار مشکل آتون مون تروئی تما انتئے کہ کنا سیاسی حریف دہائی آن داعلاقہ غا سیاست کریکہ۔
