وزیراعظم عمران خان نا بنجائی وزیر اطلاعات و نشریات چوہدری فواد حسین تون اوڑدہی ٹی ہیت وگپ

اسلام آباد۔ 18 دسمبر (اے پی پی) وزیراعظم عمران خان وزارت اطلاعات نا سرکڑدہ ہی آ پبی پت انا درشانی ءِ کرسا دا خواہش نا درشانی ءِ کرینے کہ وزارت اطلاعات ءِ میڈیا نا بابت غٹ معاملہ غاتے ٹی قائدانہ کڑد بایدے ادا کروئی مرے، حکومت جہانی کہول آ پاکستان نا دروشم ءِ تالان کننگ و الس اٹی حکومت نا اصلاحاتی و بدلی نا ایجنڈا ءِ نمان کننگ کن ہروڑنا کمک و وسیلہ فراوان کیک۔ اوداہیت ءِ بنجائی وزیر اطلاعات و نشریات چوہدری فواد حسین تون ہیت وگپ کرسا پارے ہرا سے شنبے نادے آ وزیراعظم آفس اٹی اوڑتون اوڑدہی کرے۔ چوہدری فواد حسین وزیراعظم ءِ وزارت اطلاعات نا بابت معاملہ ، ریاستی میڈیا ادارہ، پاکستان براڈ کاسٹنگ کارپوریشن و پاکستان ٹیلی ویژن کارپوریشن ءِ مستعد و گچین ءُ ادارہ اس جوڑ کننگ کن کروک آاصلاحات آتا بارواٹ معلومدار کرے۔ وزیراعظم پارے کہ ساڑی حکومت آزادی اظہار و ملک انا راجی و اقتصادی شونداری ٹی میڈیا نا آزادانہ ، فعال و زموارانہ کڑد آ پورو یخین تخک۔ اوداہیت انا اعادہ ءِ کرے کہ حکومت میڈیا ءِ تینا کسبی زمواری تا انجام تننگ اٹ ہروڑنا آسراتی فراوان کیک۔ اوڑدہی ٹی سیکرٹری اطلاعات شفقت جلیل ہم ساڑی ئس۔