راولپنڈی۔ 17 دسمبر (اے پی پی) چیف آف آرمی سٹاف جنرل قمر جاوید باجوہ ءَ مصر ءِ وزیر ءِ دیمپانی ءُُ اردی پیداوار ءُُ سلاھ بندیں اُرد ءِ کمانڈر انچیف جنرل محمد ذکی ءُُ سلاھ بندیں اُرد ءِ چیف آف سٹاف لیفٹیننٹ محمد فرید ءَ گوں گند ءُُ نند کت، آ مصر ءِ سرکاری تر ءُُ تاب ءَ اِنت۔ دو شمبے ءَ آئی ایس پی آر ءِ نیمگ ءَ جاڑی بوتگیں بیان ءِ رد ءَ اے گند ءُُ نند ءِ ساھت ءَ وت مہ وتی کار، اُرد تک ءِ یکوئی، دیمپانی ءُُ سیکورٹی کمک آنی سر ءَ ھیال ریچی کنگ بوت۔ مصری سروکی ءَ ناشرکاری ءِ گر ءُُ دار ءَ پاک اُرد ءِ کزبی ازمکاری ءُُ پاکستان راج ءِ جزم ءَ را ساڑات۔ دوئیں نیمگ ءَ یکجائی منصوبگ ، دیمپانی پیداوار، ھیل کاری ءُُ انٹیلی جنس ءَ ھوار بازیں شوبگ آنی تہ ءَ دو نیمگی کمک ءَ را گیش کنگ ءِ سر ءَ تپاک کت۔ دمگی ایمنی ءُُ سلامتی ءِ واستہ کمک ءَ را گہتر کنگ ءِ سر ءَ تپاک کنگ بوت۔ چیف آف آرمی سٹاف ءَ الازہر ءِ امام اعظم شیخ احمد الطیب ءَ گوں گند ءُُ نند کت۔ امام اعظم ءَ ملک ءَ چہ ناشرکاری ءِ ھلاس کنگ ءِ واستہ پاک اُرد ءِ کوشست آناں ساڑات۔ آئی ءَ سرجمیں پاکستان ءِ شاہزانت ءُُ نیک راھی سکالرز آنی نیمگ ءَ کشاں چیل ءِ سبب ءَ پیداک بوتگیں جیڈھ آنی بابت ءَ ’’ پاکستان ءِ کلوہ‘‘ فتویٰ ءِ بنگیج ءِ ھم توسیپ کت۔ آئی ءَ گوشت کہ اسلام یک جوانیں نیک راھ ءُُ سرجمیں دین اِت ءُُ ایش میاں استمانی دگنیا ءَ ناشرکاری، کشاں چیل ءَ گوں بند ءُُ کڈئی کنگ مہ بیت۔ آرمی چیف ءَ مسلمانیں ورنا آنی روژنائیں ھیال ءُُ لیکہ، تکنیکی دیمروئی، ءُُ وت مہ وتی ءِ نیمگ ءَ دلگوش کنگ ءِ سر ءَ زور پر دات۔ ایشی ءَ چہ پیسر مصری اُرد ءِ ورنا آں چیف آف آرمی سٹاف جنرل قمر جاوید ءَ را وزارت ءِ دیمپانی ءَ گارڈ آف آنر پیش کت۔
