اسلام آباد۔ 14دسمبر (اے پی پی) پاکستان و جرمنی نا نیام اٹ انسداد پولیو مہم نا ارٹ میکو مرحلہ کن 79 کروڑ روپئی نا خڑچ انا مالیاتی معاہدہ پک مس۔ پاکستان نا کنڈآن سیکرٹری اقتصادی امور ڈویژن نور احمد و جرمنی نا کنڈآن کے ایف ڈبلیو نا کنٹری ڈائریکٹر وولف گینگ موئلر معاہدہ غا دستخط کریر۔ دا معاہدہ پاکستان نا نیشنل پولیو ایمر جنسی ایکشن پلان 2018-19 ء آ عملدرآمد نا چرجوئی ٹی پولیو ویکسین و انسداد پولیو نا مہم آتا فنانسنگ آ تالان ءِ۔ دا پروگرام یونیسیف و جہانی ادارہ جان جوڑی (ڈبلیو ایچ او) نا کنڈآن چلیفنگک ہرا ملک اٹی انسداد پولیو پروگرام نا اولیکو مرحلہ نا تسلسل ءِ۔ یات سلے کہ وزیراعظم نا سرکڑدہ ہی ٹی پولیو نا چٹفنگ کن جوڑ کروک نیشنل ٹاسک فورس انا کوشست آتیان ملک اٹی پولیو نا کیس آتے ٹی نمان کمتی بسنے۔ 2014ء ٹی ملک اٹی پولیو نا 306کیس مون آ بسوسس ہرا 2015ء ٹی کم مرسا 54سلیسر وخت اس کہ 2016ء ٹی 20 و 2017 ء ٹی پولیو نا 8 کیس رجسٹرڈ کننگار۔ اینخو نا سال ملک اٹی پولیو نا بیرہ 4کیس مون آ بسنو۔ پاکستان اٹی انسداد پولیو نا کوشست آتے ٹی نمان سرسہبیآقومی و جہانی کہول آتا ستاءِ کننگانے ۔ وزارت نیشنل ہیلتھ سروسز ریگولیشن اینڈ کوآرڈینیشن نا کنڈآن 2020 ء اسکان پاکستان نا پولیو آن فری ملک اس جوڑ مننگ نا اومیت ظاہر کننگانے۔
