لاہور۔ 14دسمبر (اے پی پی) گورنر پنجاب چوہدری محمد سرور پارینے کہ برآمد آتے مون آ دننگ و کاروباری چاگڑد ءِ گچین جوڑ کننگ کن حکومت ہندی فرنیچر انڈسٹری تا ہروڑ کمک ءِ کیک و دا ہیت ءِ کہ پاکستان آن تیار فرنیچر آتا مصنوعات تینا بڑزکو آب انا بناآ جہانی مارکیٹ اٹی جاگہ اس جوڑ کننگ نا پبی لائخی تخک۔ اوداخیال آتا درشانی ءِ جمعہ نادے داڑے ایکسپو سینٹر اٹی پاکستان فرنیچر کونسل نا کنڈآن مسہ دے ئی جہانی میگا نمائش ’’انٹیریئرز پاکستان‘‘ نا بناءِ کرسا کرے۔ اوبزنس کمیونٹی آ زور شاغاکہ او پاکستان اٹی ہندی صنعت ءِ مون آ دننگ کن است جمی اٹ کاریم کیر۔ پاکستان وسیلہ غاتیان مالامال ءِ و ننا خلقت اٹی کسب کار و مہارت ارے ہراڑآن ملک ءِ پوسکن آ وڑوڈول آتیا شون تننگ اٹ کمک ملنگ کیک۔ اوپارے کہ پی ٹی آئی نا حکومت دابشخ اتون اواری اٹ مارکیٹ نا حالیت آتے گچین جوڑ کننگ، داصنعت نا گرج آتے پورو کننگ، اونا شونداری و مون آ دننگ کن غٹ وسیلہ غاتے کاریم اٹ اتیک۔ تعلقدار کمامدار آتے ہم پانہ کہ فرنیچر نا کاروبار کن زیات آسانی اٹ دوئی مننگ نا قابل گرانٹس ءِ ممکن و واپاری نمائش تے ٹی بشخ ہلنگ کن وڑوڈول ءِ آسان جوڑ کننگے۔ اوپارے کہ داہیت انا تعین ءِ کننگ کن کہ ننا صنعت آتے ہراوڑ جوان جوڑ کننگ مریک صنعت تون وابستہ بندغ آتون پدریسہ رابطہ کننگ المی ءِ۔
