اسلام آباد ۔ 14دسمبر (اے پی پی) بنجائی وزیر کانود و انصاف بیرسٹر فروغ نسیم پارینے کہ ایڈن ہاؤسنگ اسکیم نا 7611زہمی 11ارب روپئی نا کلیم جمع کرفینو وخت اس کہ دوبہ دارآتا میرات آتے نیب تینا تحویل اٹی ہلکونے۔ جمعہ نادے ایوان بالا ٹی وقفہ سوج آتے ٹی سینیٹر محمد طاہر بزنجو نا سوج انا ورندی ٹی اوپارے کہ ایڈن ہاؤسنگ اینڈ ڈویلیپر سوسائٹی نا انتظامیہ و ایلوفتا برخلاف 11جنوری 2018ء ٹی جاست وپاست نا بناءِ کننگا، دوبہ دار ڈاکٹر محمد امجد، انجم امجد ، مرتضیٰ امجد و مصطفی امجد تفتیش کن پیش متوس، 12ستمبر 2018ء آ احتساب عدالت اوفتے اشتہاری گوندا۔ دوبہ دار آتا منقولہ و غیر منقولہ میرات آتے نیب 20 جون 2018 ء آ منجمد کرینے۔ اوپارے کہ ایڈن ہاؤسنگ اسکیم نا 7611 زہمی 11ارب روپئی نا کلیم جمع کرفینو۔ اوپارے کہ حکومت دیوانی و فوجداری مقدمہ غاتے زوت پورو کننگ کن کانود سازی آ کاریم کننگ ءِ ، ایوان دا بابت بایدے حکومت تون سلے۔ وزارت کانود وانصاف نا کنڈآن ایوان بالا ءِ نوشتہی وڑاٹ معلومدار کننگانے کہ پاکستان کمیشن کانود و انصاف آن ملوک آ معلومداری نا رداٹ سپریم کورٹ آف پاکستان اٹی 39 ہزار 742، لاہور ہائی کورٹ اٹی اسہ لکھ 65ہزار 800، سندھ ہائی کورٹ اٹی 91ہزار 548، پشاور ہائی کورٹ اٹی 29 ہزار 444، بلوچستان ہائی کورٹ اٹی 6ہزار 852 و اسلام آباد ہائی کورٹ اٹی 17ہزار 56مقدمہ غاک پدسلوک ءُ۔
