اسلام آباد۔ 14دسمبر (اے پی پی) وزیر مملکت پارلیمانی امور علی محمد خان نا کنڈآن قومی اسمبلی ءِ پاننگانے کہ زلفی بخاری پیشن نا ملک اٹی رہینگک ، ہنداخاطران او پردیسی تا معاملہ غاتے سہی پہہ مریک، وزیراعظم تینا صوابدیدی اختیار آتارداٹ ہرکس ءِ تینا کمکار پن کننگ کیک۔ جمعہ نادے قومی اسمبلی ٹی وقفہ سوج آتے ٹی مرتضیٰ جاوید عباسی نا سوج انا ورندی ٹی وزیر مملکت پارلیمانی امور علی محمد خان پارے کہ پاکستان زرعی تحقیقاتی کونسل اٹی باسک مالیاتی سید تراب حیدر تینا ہی تنخواہ غاہی تینا اسکیل اٹی تعینات مسنے۔ وزیراعظم نا صوابدیدی مریک کہ او ہرکس ءِ چائے کمکار نا وڑاٹ تعینات کننگ کیک و دالائخی نا بنداوآ تعیناتی مریک۔ وزیراعظم تینا سنگت اسے خلتنے ۔ زلفی بخاری پیشن نا ملک اٹی رہینگک او دا پردیسی تا معاملہ غاتے جوان پہہ مریک۔ کس اسے ذاتی بنداو تیا ٹارگٹ بایدے کننگپ۔ محسن شاہنواز رانجھا پارے کہ اسسٹنٹ و ایڈیشنل اٹارنی جنرل نا تعیناتی تے کننگانے اوفتا درکارآزموندہ و اہلیت اف۔ سی ڈی اے ٹی ہرالیگل ایڈوائزر آتے خلنگانے اوفک منہ وخت مست اسہ موٹرسائیکل سوار فیملی اسے چپانٹ اس خلکر و سپریم کورٹ دانا تینٹ نوٹس ءِ ہلکوسس۔ علی محمد خان پارے کہ اگہ کس اسے نا تجربہ پورو اف تو اونا بارواٹ سرجم آتے پابو اوفتا جاچ ءِ ہلینہ۔ ہراسٹ کہ درکار معیار ءِ پورو کپک اونا نوٹس ءِ ہلینہ۔
