اسلام آباد۔ 14دسمبر (اے پی پی) وزیراعظم نا خصوصی کمکار اوورسیز پاکستانیز سید ذوالفقار عباس بخاری پارینے کہ گوازی انسان ءِ نظم و ضبط ہیل ایتک ، ہراتم تم مچ آ زند نظم و ضبط نا درشانی ءِ کیرے تو اسہ دے اس عمران خان آنبار وزیراعظم ہم جوڑ مننگ کیرے۔ داخیال آتا درشانی ءِ او اوپی ایف گرلز کالج ایف ایٹ اٹی سالانہ سپورٹس ڈے انا دود آن بطور مہمان خاص تران کرسا کرے۔ اوپارے کہ چناتے کن غٹ آن بھلا مثال ننا وزیراعظم عمران خان ءِ ہراپدریسہ جہد آن ہر پڑاٹ تینا جتا ءُ ہند اس جوڑ کرے و سیاست اٹی 22سال انا جہد آن پد اینو ننا ملک انا بھلا لیڈر ءِ۔ اوغیر نصابی سرجز آتا بابت زور شاغسا پارے کہ مسنک گوازی تا پڑاٹ بایدے مون آ بریر۔مسن تا گوازی ٹی مون آ بننگ شون ہلوک پاکستان نا مثال ءِ۔ علاقائی رنگ آتا کمک اٹ چناک اصل پاکستان نا رنگ ءِ نشان تسر۔ اوپارے کہ کنے خوشی ءِ اوپی ایف کالج چناتا تربیت آ خصوصی چکار کرینے۔ اوسپورٹس ڈے آ کالج انتظامیہ و لمہ و باوہ غاتے مبارکباد پیش کرے۔
