اسلام آباد۔ 14دسمبر (اے پی پی) بنجائی وزیر ڈٹ بندی، شونداری ، اصلاحات و شماریات مخدوم خسرو بختیار پارینے کہ بلوچستان نا شونداری حکومت نا اہم اولیت آتے ٹی اوار ءِ، دیکی روٹ سی پیک نا اہم ءُ ڈٹ اسے، سرکاری بشخ انا شونداری پروگرام نا رداٹ ہم بلوچستان نا تہہ ٹی انفراسٹرکچر و ڈیم تا ڈٹ آتے پورو کننگک۔ داخیال آتا درشانی ءِ او بلوچستان ہاؤس اسلام آباد اٹی وزیراعلیٰ بلوچستان جام کمال خان تون اوڑدہی ٹی کرے۔ اوڑدہی ٹی بلوچستان آن تعلق تخوک آ سینیٹرز و قومی اسمبلی نا باسک آک ساڑی ئسر۔ اوڑدہی ٹی 20 دسمبر آ مروک آ سی پیک جے سی سی نا تیاری تا جاچ ءِ ہلنگا۔ اوڑدہی ٹی بنجائی وزیر مخدوم خسرو بختیار پارے کہ بلوچستان نا شونداری حکومت نا اہم اولیت آتے ٹی اوار ءِ ، دیکی روٹ سی پیک نا اہم ءُ ڈٹ اسے۔ اوپارے کہ دیکی روٹ انا ژوب ڈیرہ اسماعیل خان سیکشن نا ڈٹ جائنٹ کوآپریشن کمیٹی ایجنڈاٹی اوار ءِ۔ داشاہراہ نا جوڑ کننگ آن بلوچستان و خیبر پختونخوا نا مر مر انگا علاقہ غاتا شون ممکن مریک۔ اوپارے کہ جے سی سی دیوان اٹی گوادر ڈٹ آتیا اہم پیش رفت مریک۔ سی پیک نا رداٹ راجی بشخ اٹی شونداری نا کیہی ڈٹ آتا بناءِ کننگک۔ بنجائی وزیر پارے کہ راجی بشخ انا ڈٹ آتے ٹی بلوچستان ءِ مناسب بشخ تننگک، راجی بشخ انا ڈٹ آتے مسہ سال انا وخت اٹی عملی دروشم اس تننگک۔ راجی بشخ انا رداٹ ملک انا پد سلوک علاقہ بشمول بلوچستان نا شونداری آ پورو چکار کننگک۔ اوپارے کہ پی ایس ڈی پی نا رداٹ ہم بلوچستان نا تہہ ٹی انفراسٹرکچر و ڈیم تا ڈٹ آتے پورو کننگک۔ وزیراعلیٰ بلوچستان جام کمال خان سی پیک دیکی روٹ ڈٹ انا جے سی سی ایجنڈاٹی اوار مننگ آ است جمی نا درشانی ءِ کرسا پارے کہ راجی بشخ انا ڈٹ آتیان بلوچستان نا شونداری ممکن مریک، دارداٹ بنجائی حکومت نا کمکاری نا سخت ضرورت ءِ۔ اوپارے کہ بلوچستان اٹی ڈیم ڈٹ آتیان دیر انا شدید تنکی نا مون ءِ توننگ اٹ کمک رسینگک۔ بلوچستان اٹی سی پیک انفراسٹرکچر ڈٹ آتا پوروی آن پدسلوک آ علاقہ غاتے ٹی شونداری ممکن مریک۔
