اسلام آباد۔ 13دسمبر (اے پی پی) بنجائی وزیر خزانہ اسد عمر پارینے کہ انصاف نا گرج ءِ کہ ہراسٹ ملک ءِ لُٹا اوبایدے بچپ ہِننگ کپ، لس الس وڈی خور خلقت نا احتساب ءِ خوارہ، سعودی عرب زوت پاکستان اٹی بھلو زرکاری اس کیک، ملکی معیشت نا سوگوی کن گام گیج کننگ اُن، خراج نا بابت معاملہ غاتے گچین جوڑ کننگ انگ ءِ، ایمنسٹی نا اس اتنگ نا ہچ ءُ پروگرام اس اف۔ پنچ شنبے نادے اسلام آباد اٹی اسہ دود اسے آن تران کرسا اوپارے کہ پاکستان نا الس وڈی خور خلقت نا احتساب ءِ خوارہ ، الس تون ملیوہ تو پارہ کہ دُزآتے ہراتم الیرے۔ اوپارے کہ راج اٹی انصاف تننگ اولیت ءِ، وڈی خوری ءِ چٹفنگ آن بیدس اسہ راج اس ہم شون ہلنگ کپک، انصاف نا گرج دادے کہ اگہ جیب تڑوک آءِ جیل مریک تو ملک ءِ پلوک آءِ ہم بایدے مرے۔ وزیر خزانہ ملک انا معاشی حالیت و اوٹی گچینی کن گام گیج آتا ذکر ءِ کرسا پارے کہ حکومت کم و ود ہفت لکھ ہموبندغ آتے کوائف ءِ جمع کرینے ہرافتے خراج بایدے تروئی مرے۔ اوپارے کہ چندی ملک آتون معاہدہ کننگانے ہرافتیان ننے دابندغ آتا بابت معلومداری دوئی مننگ کیک ہرافک تینا میرات آتے پیشن نا ملک آ گدریفیر یا خراج دُزی کن اوفتے ڈکار۔ وزیر خزانہ پارے کہ کم و ود اسہ لکھ 52ہزار ہندن انگا بندغ آتا حساب وکتاب ءِ یکجا کننگانے و حکومت ءِ پیشن نا ملک آ میرات آتے گدریفوک آ ایلو بندغ آتا بارواٹ پین معلومداری زوت ملک۔ داوخت آ روپئی نا مقابلہ ٹی ڈالر نا ودوک آ قدر آ تران کرسا اوپارے کہ گدرینگوک آ حکومت آک ڈالر نا داودوک آ کچ انا زموارءُ۔ اسد عمر پارے کہ تحریک انصاف نا حکومت زرکارآتے سازگار چاگڑد اس فراوان کرینے، و پیشن نا ملک آتے ٹی رہینگوک آ پاکستانی تا کنڈآن بروک آ دے تے ٹی ملک اٹی زرکاری گمانی ءِ۔ اوپارے کہ چندی ملک آک زرکاری کن تیار ءُ، سعودی عرب زوت پاکستان اٹی بھلو زرکاری اس کیک، دا بابت سعودی سرکڑدہ غاتا کنڈآن کلہو آک ملنگ ءُ، بروک آ ہفتہ کابینہ آن درملکی زرکاری نا بابت منظوری ہلنگک۔ داوخت آ کاروباری نمائندہ غاتا سوج آتا ورندی ءِ ترساا وپارے کہ خراج نا بنداو ءِ ودفنگ انگ ءِ وخت اس کہ د اچرجوئی ٹی پالیسی اصلاحات ہم عمل اٹ اتنگ انگ ءِ، ایف بی آر داسہ انتظامی معاملہ غاتے ہرک وخت اس کہ وزارت خزانہ خراج پالیسی جوڑ کیک۔ اوپارے کہ مستین اٹی کس اسے فائدہ تننگ کن ایف بی آر اٹی ایس آر او جاری مسکہ ولے داسہ دُن مفک۔ ایف بی آر اٹی پوسکن آ سسٹم نا جوڑ کننگ آن ویل آتا مون ءِ توننگک۔ اوپارے کہ معاشی معاملہ غاتے گچین جوڑ کننگ انگ ءِ ، خراج ایمنسٹی نا اسکیم اتنگ نا ہچ ءُ پروگرام اس اف۔ اوپارے کہ این ایف سی نا رداٹ صوبہ غاتے بھلو وسیلہ اس ملنگ ءِ، داسہ صوبہ غاتے ہم تینا زمواری تے بایدے پورو کروئی مرے۔ تجاوزات آتا برخلاف آپریشن نا بابت اسہ سوج اسے آ اوپارے کہ ہر ویل انا ایسر بلڈوزر ءِ چلیفنگ اف، ہراخلقت تینا روپئی آ مچ کرسا اُراجوڑ کریسر اوفتے تو معلوم الوکہ کہ دا جاگہ نا اسٹیٹس انت ءِ، داتعلقدار ادارہ غاتا زمواری ئس کہ اوفتے ہمووخت آ پاروسر۔ اوپارے کہ اسلام آباد اٹی بھلا کوزہ گر تا برخلاف کارروائی کننگانے، چنکا دوکاندار و ہنکینی تے تکلیف آن بچفنگ کن وزیر مملکت داخلہ شہریار آفریدی نا کماشی ٹی کمیٹی اس ٹہیفنگانے ہراٹی عامر محمود کیانی، راجا خرم نواز و علی نواز اعوان اوار ءُ۔ او داویل انا جاچ ءِ ہلیرہ و داہیت ءِ المی جوڑ کیرہ کہ نیزگار دوکاندار و ہنکینی تے تکلیف رسینگپ ۔ اسہ پین سوج اسے نا ورندی ٹی اوپارے کہ شام انا 7 آن یانزدہ بجہ اسکان ٹی وی چینل آتیا انتس کہ چلینگک داہیت آن اندازہ ءِ خلنگ مریک کہ میڈیا غا اخس سنسر شپ عائد ءِ۔ اوپارے کہ ننا حکومت نا اولیت کارکڑدگی ءِ، آفیسر آتا وابستگی ہراجماعت تون ءِ یا اوفک دیر ءِ وونٹ تسر داڑتون ننے ہچ ءُ کاریم اس اف۔
