سعودی فرمانرواتون پوسکن آ مردم شماری نارداٹ پاکستان نا حج کوٹہ ٹی ودکی نا درخواست کینہ، ڈاکٹر عارف علوی
مدینہ منورہ۔ 12دسمبر (اے پی پی) صدر مملکت ڈاکٹر عارف علوی تون وزیر مذہبی امور ڈاکٹر نور الحق قادری اوڑدہی کرے۔ ہراٹی صدر مملکت ءِ وزیر مذہبی امور نا کنڈان سعودی عرب تون حج معاہدہ غاتا بابت سرجم احوال تننگا۔ وزارت مذہبی امور نا رداٹ چارشنبے نادے داڑے وزیر مذہبی امور ڈاکٹر نور الحق قادری صدر مملکت ڈاکٹر عارف علوی تون اوڑدہی کرے۔ وزیر مذہبی امور صدر مملکت ءِ سعودی کمامدارآتون مذاکرات و حج معاہدہ غاتا بابت احوال تس۔ صدر مملکت ڈاکٹر عارف علوی پاکستانی حاجی تا کوٹہ ٹی 5ہزار نا ودکی ءِ ستاکڑزوک گوندا۔ صدر مملکت عندیہ ظاہر کرے کہ او سعودی فرمانرواشاہ سلمان تون تینا اوڑدہی ٹی پوسکن آ مردم شماری نا رداٹ پاکستان نا حج کوٹہ ٹی ودکی نا درخواست ءِ کیک۔ اوکان پد ڈاکٹر نور الحق قادری صدر مملکت ڈاکٹر عارف علوی تون اوار روضہ رسول آ حاضری تس۔ داوخت آ ملک و ملت نا شونہالی و شونداری کن خصوصی دعاہم کننگا۔
