اسلام آباد۔ 12 دسمبر (اے پی پی) وزیر مملکت مواصلات مراد سعید پارے کہ موٹروے نا فیصل آباد، ملتان و عبدالحکیم سیکشن ءِ زوت ٹریفک کن ملنگک، 250 کارندہ غاتا تعیناتی ءِ ہم زوت کننگک، موٹروے آ ریسٹ ایریا ٹی گڑاتے کبین بہاکننگ نا بابت صوبائی حکومت آتا نوٹس اٹی دامعاملہ ءِ اتنگک۔ چارشنبے نادے قومی اسمبلی ٹی ملک محمد عامر ڈوگر نا ایم ون اسلام آباد پشاور موٹروے آ آب اٹ سروس سینٹر نا آسراتی میسر مفننگ نا بابت چکاری نوٹس نا ورندی ءِ ترسا وزیر مملکت مواصلات مراد سعید پارے کہ دامعاملہ نا نن جاچ ءِ ہلکونن۔ ایم ون آ مسیت و واش روم جوڑ کننگ کن بولی بسنے۔ اوپارے کہ فیصل آباد، ملتان موٹروے آ موٹروے پولیس نا 295کارندہ زوت تعینات کننگک و زوت ہی فیصل آباد ملتان و عبدالحکیم سیکشن ءِ ٹریفک کن زوت ملنگک۔ اسہ سوج اسے نا ورندی ٹی وزیر مملکت مراد سعید پارے کہ موٹروے آ گڑاتے کبین بہا کننگک۔ نن دا بابت دامعاملہ غا تعلقدار صوبائی حکومت آتون ہیت کرینن۔ ہراتعلقدار ضلع ٹی ریسٹ ایریا مریک ضلعی انتظامیہ نہاد آتے مانیٹر کننگ نا زموار مریک۔
