اسلام آباد۔ 12دسمبر (اے پی پی) بنجائی وزیر توانائی عمر ایو ب خان کراچی آن قومی اسمبلی نا باسک آتے پیش کرینے کہ او کراچی ٹی بجلی نا ویل انا بابت کے الیکٹرک نا بڑزکو کمامدارآتون اوفتا اوڑدہی نا بست و بند ءِ کننگ کیرہ، ملک اٹی 5کروڑ بندغ داسہ ہم بجلی کون آ بنداوی آسراتی تیان محروم ءُ، اوفتے بجلی نا آسراتی تننگ کن چنکو ڈٹ آتا بناءِ کننگ خوانہ، کے الیکٹرک ءِ ٹرانسمیشن لین و ایلو بشخ آتیا ہم زرکاری بایدے کروئی مرے۔ چارشنبے نادے قومی اسمبلی ٹی وقفہ سوج آتے ٹی حناربانی کھر نا سوج انا ورندی ٹی عمر ایوب پارے کہ توانائی ءِ پوسکن آ وڑوڈول آتیا کننگ نا ٹیرف مسکوہی حکومت نا ئس۔ بی 1، بی 2 و بی 3 ٹیرف جتا ءُ۔ پی پی آئی بی دیر انا اسہ پن بجلی نا ڈٹ گڑاس کانودی ویل آتا بناء آ ختم کروئی تما۔ اوپارے کہ داوخت آ ہم صارف آک ٹیرف اٹی 33 درسد صلاحیت نا ادائیگی کیرہ۔ پاکستان نا مر مر انگا پنچ کروڑ خلقت نا بجلی اسکان رسینگ اف۔ اوفتے چنکا ڈٹ آتا بناءِ کننگ خوانہ۔ اسہ پین ضمنی سوج اسے نا ورندی ٹی وزیر توانائی عمر ایوب پارے کہ کے الیکٹرک تون ٹرانسمیشن و ڈسٹری بیوشن تون معاملہ غاتے ٹی کے الیکٹرک ءِ دابشخ آتیا زرکاری بایدے کروئی مرے۔
