اسلام آباد۔ 11دسمبر (اے پی پی) قائم مقام صدر محمد صادق سنجرانی پارینے کہ سی پیک نا رداٹ گوادر آن بناء کروک شونہالی آن بلوچستان نا حالیت آک مثبت سمت انا کنڈاکارہ و گچین آخبت کن داموقع آن پبی فائدہ ہرفوئی مریک۔ داخیال آتا درشانی ءِ او سے شنبے نادے ایوان صدر اٹی لورالائی آن دورہ غا بروک آ استاد و طالب علم آتیان تران کرسا کرے۔ قائم مقام صدر پارے کہ طالب علم آک ننا قوم انا آخبت آک ءُ و دااسہ راستکی اسے کہ اینو نا دا طالب علم آک پگہ ہندا راہداری تے ٹی پاکستان نا لیڈر نا وڑاٹ نظر بریرہ ۔ محمد صادق سنجرانی استاد و طالب علم آتیان تران اٹی پارے کہ خواری و لگن آن بیدس ہم اومیت آتیا پورو سلنگ کپنہ۔ اوداہیت آ زور شاغاکہ چیلنج آتیا پورو سلنگ کن پبی خواری اٹ کاریم کیر و بلوچستان نا شونداری و شونہالی ٹی تینا کڑد ءِ ادا کیر۔ قائم مقام صدر لورالائی بلوچستان نا استاد و طالب علم آتون پارے کہ کنکن داموقع دالحاظ اٹ ہم اسہ خاص ءُ اہمیت اس تخک کہ نم دا صوبہ غان بسنورے ہراڑآن کنا ہم تعلق ءِ۔ اواستاد وطالب علم آتے باوری ترفے کہ او بحیثیت چیئرمین سینیٹ تینا مخلصانہ جہد ءِ برجاتخک ہراڑان صوبہ بلوچستان نا ورنانسل کن تعلیم نا پڑاٹی زیات آن زیات وارخواہی ودی کننگ مرے و اوفتے شونداری نا عمل ءِ مون آ دننگ اٹ تینا کڑد ءِ ادا کننگ نا وارخواہی فراوان کننگ مرے۔ قائم مقام صدر لورالائی نا استاد و طالب علم آتے ایوان صدر آ بننگ آ اوفتا منت واری ءِ ہم ہرفے۔
