منشیات نا چٹفنگ کن ڈیہہ نا غٹ ملک آتے اواری اٹ کاریم کروئی مریک
اسلام آباد۔ 11 دسمبر (اے پی پی) بنجائی وزیر انسداد منشیات سردار علی محمد خان مہر پارینے کہ منشیات نا چٹفنگ کن ڈیہہ نا غٹ ملک آتے اواری اٹ کاریم کروئی مریک، منشیات نا سمگلنگ ءِ توننگ کن معلومداری تا ہل و تس و سیمی اتنظام ءِ پین گچین جوڑ کننگ ناگرج ءِ، پاکستان ایران و اوغانستان منشیات نا سمگلنگ نا توننگ کن اواری اٹ کاریم کننگ ءُ۔ داخیال آتا درشانی ءِ او سے شنبے نادے اوغانستان، ایران وپاکستان نا سہ کڑدہ ہی پروگرام نا سینئر کمامدارآتا 13می دیوان آن تران کرسا کرے۔ بنجائی وزیر پارے کہ پاکستان ءِ منشیات آن پاک کننگ کن گام گیج کننگ اُن۔ چناتا روشنا آخبت کن منشیات نا چٹفنگ ننا اہم ءُ گرج اسے۔ اوپارے کہ منشیات آن پاک راج شونداری نا ضمانت ءِ۔ پاکستان نا منشیات نا چٹفنگ نا بابت گام گیج آتاجہانی کہول آ ستاءِ کننگانے۔ داکان مست ایران و اوغانستان نا ڈل آتے بخیرکرسا بنجائی سیکرٹری وزارت انسداد منشیات عارف نواز خان پارے کہ دا کانفرنس اٹی علاقائی نمائندہ غاک علاقائی کمکاری نا دا جتا بست وبند آتیا مروک آ پیش رفت آ سجفرہ ہرافتیا سہ کڑدہ ہی پروگرام نا رداٹ ہر مسٹ آ ملک آک امنا کرینو ، دافتے ٹی معلومداری تا ہل و تس ڈٹ بندی و منشیات نا توننگ نا سرجز و سیمی رابطہ دفترآتا جوڑ کننگ تون اوار علاقائی کہول آ گام گیج آتے گچین جوڑ کننگ نا ءِ۔ سینئر کمامدارآتادیوان آن ہر مسٹ آ ملک آتا اسہ جامع و متوازن سوچ اسے آ عمل کرسا اسیجا مشکل آتا ایسری اس پٹنگ اٹی کمک رسینگک۔ دیوان اٹی اسیجا زمواری تا اصول نا رداٹ علاقائی کمکاری ءِ گچین جوڑ کننگ آہم خیال آتا درشانی ءِ کننگک۔
