اسلام آباد۔ 11دسمبر (اے پی پی) اسپیکر قومی اسمبلی اسد قیصر پارینے کہ قائمہ کمیٹیک ایوان اٹی کانودسازی نا دروشم ءُ، اومیت ءِ کہ ہندا دیوان اٹی ہی کمیٹی تا ٹہیفنگ اٹی غٹ اڑاندآک چٹرہ۔ سے شنبے نادے پارلیمنٹ ہاؤس اٹی حکومتی راہشون تا سلابتی دیوان اس اڈ ہلک ہراٹی وزیر دفاع پرویز خٹک ، وزیر خارجہ شاہ محمود قریشی ، بنجائی وزیر کانود و انصاف فروغ نسیم ، بنجائی وزیر علی امین گنڈاپور، وزیر مملکت پارلیمانی امور علی محمد خان، ڈپٹی اسپیکر قاسم خان سوری ، چیف وہپ ملک محمد عامر ڈوگر و پارلیمانی سیکرٹری کانود و انصاف ملیکہ علی بخاری ئسک بشخ ہلکر۔ دیوان اٹی کانود سازی نا عمل ءِ دمدستی و گچین جوڑکننگ کن سلاہ وسوج آتیا سجفنگا۔ اسپیکر قومی اسمبلی حکومتی وزیر آتے اپوزیشن جماعت آتون رابطہ غاتا پارت کرے و پارے کہ قائمہ کمیٹی تا ٹہیفنگ و اوفتا کسر اٹی غٹ اڑاند آتے چٹفنگ کن تینا کڑد ءِ ادا کیر۔ اوپارے کہ قائمہ کمیٹیک ایوان اٹی کانودسازی نا اصل دروشم ءُ ، تین پہ تینی سلابت آن حکومتی و اپوزیشن جماوعت آتا سوچ ءِ یکجا کننگ نا کوشست کیوہ۔ اواومیت ظاہر کرے کہ ہندا دیوان اٹی کمیٹی تا ٹہیفنگ نا چرجوئی ٹی غٹ اڑاند آک چٹرہ۔ دیوان اٹی ہندا تُو قومی اسمبلی نا مروک آ دیوان نا بارواٹی ہم خیال آتا درشانی ءِ کننگاو ایوان اٹی چاگڑد ءِ خوشگوار تخنگ وکانود سازی نا بابت آن ہم گپ و تران کننگا۔
