اسلام آباد۔ 11دسمبر (اے پی پی) بنجائی وزیر اطلاعات و نشریات چوہدری فواد حسین چندی ٹی وی چینل و میڈیا ادارہ غاتیان صحافی تا برطرفی و اوفتے تنخواہ تا تفننگ نا حالیت آتیا گڑتی نا درشانی ءِ کرسا باوری ترفے کہ حکومت دا چرجوئی ٹی اے پی این ایس و صحافی تا تعلقدار تنظیم آتون اواری اٹ دا ویل ءِ ایسر کرفنگ کن ہروڑنا کڑد ادا کیک، چندی ٹی وی چینل و ادارہ غاک پرویز مشرف، پیپلزپارٹی و نواز شریف نا دور تا 7 ارب روپئی نا سلوک آ پیسہ غاتا کلیم کرینو، 7 ارب روپئی آن ادارہ غاتا اسہ ارب 30 کروڑ روپئی نا زرپک مروک ءُ، مشکل انگا حالیت آتا سوب صحافی تے ریلیف تننگ کن بنجائی و پنجاب نا صوبائی حکومت 46 کروڑ روپئی نا زر ریلیز کننگ ءُ۔ سے شنبے نادے پارلیمانی رپورٹرز پریس گیلری آن چندی ٹی وی چینل و ادارہ غاتیان صحافی و ورکرز آتا برطرفی و تنخواہ تا تفننگ نا حالیت آتیا واک آؤٹ کریر۔ داڑآ حکومت نا کنڈان بنجائی وزیر اطلاعات و نشریات چوہدری فواد حسین ، پارلیمانی سیکرٹری عند لیب عباس و زرتاج گل پریس لاؤنج اٹی ہیت وگپ کن بسر۔ داوخت آ پی آر اے نا صدر قربان بلوچ، نائب صدر ارشد وحید چوہدری، سیرکٹری بہزاد سلیمی و ایلو صحافیک وزیر اطلاعات و نشریات ءِ غٹ حالیت آتیان معلومدار کریر۔ فواد چوہدری پارے کہ پی ٹی آئی صحافی تتون پورو یکجہتی نا درشانی ءِ کیک۔ جتا ٹی وی چینل و ادارہ غاک پرویز مشرف، پیپلزپارٹی و نواز شریف نا دور انا 7 ارب روپئی نا سلوک آ پیسہ غاتا کلیم کرینو۔ اوپارے کہ پرنسپل انفارمیشن آفیسر (پی آئی او) سرکاری اشتہار آتا چاروکی ءِ کیک۔ ننا کلائنٹ ادارہ اس اف بلکن ایڈورٹائزنگ ایجنسی اسے۔ 7 ارب روپئی آن ادارہ غاتا 1.3 ارب روپئی زر پک مروک ءُ۔ حکومت دا پیسہ غاتے صحافی ایلم و میڈیا ورکرز آتے ریلیف تننگ نا غرض اٹ ریلیز کرینے۔ مشکل انگا حالیت آتا باوجود نن ادائیگی کرینن، نن دا پیسہ غاتے کفایت شعاری اٹ مچ کریسن اوفتے نن ذرائع ابلاغ ءِ تسونن۔ وزیر اطلاعات پارے کہ نن اشتہار آتا بابت پوسکن ءُ ایڈور ٹائزنگ پالیسی اس جوڑ کننگ اُن۔ نن ایڈور ٹائزنگ ایجنسی نا کڑد ءِ چٹفسا براہ راست اشتہار تننگ آ سجفنگ اُن۔ او صاف لوز آتے ٹی پارے کہ نن صحافی تتون سلنہ۔ نن ہراتم ادارہ غاتے ادائیگی کینہ تو او پوسکن ءُ رولز رائس و تین کن جہاز ہلسا تولرہ۔ ادارہ غاک تینا ورکرآتا بایدے خیال ءِ تخر۔ داوخت آ صحافیک خواست کریر کہ اے پی این ایس تون ہراتم دا معاملہ غا ہیت کننگے تو صحافی تنظیم نا نمائندہ غاتے ہم ہمووخت آ ضرور بٹنگ انگے۔ وزیر اطلاعات پارے کہ ذرائع ابلاغ نا صنعت اٹی داسہ ہم بھاز زیات کچ ساڑی ارے۔ نن پوسکن ءُ میڈیا یونیورسٹی اس جوڑ کننگ اُن۔ مسکوہی دور تے ٹی اشتہار آتا کچ 15 ارب روپئی آن ودفسا ہراتسکان سرکننگا، داغٹ انا مون آٹی ءِ۔ لامحالہ دا کچ ءِ کم مروئی ئسک۔ اوپارے کہ اے پی این ایس تون ہیت وگپ نا عمل اٹی صحافتی تنظیم تا 15باسکی ڈل ہم اوار مریک و حکومت دا ویل ءِ ایسر کرفنگ کن ہروڑنا کڑد ادا کیک۔ بنجائی وزیر اطلاعات ونشریات چوہدری فواد حسین نا یخین دہانی آ پارلیمانی رپورٹرز آک واک آؤٹ ءِ چٹفسا پریس گیلری ٹی پدی بسر۔
