اسلام آباد۔ 11دسمبر (اے پی پی) بنجائی وزیر پٹرولیم غلام سرور خان پارینے کہ ملک اٹی گیس انا ہچ ءُ جاگہ اس لوڈشیڈنگ اف۔سوئی سدرن اٹی 13درسد گیس دُزی مننگ ءِ ہراڑان سالانہ26ارب روپئی نا نسخان مننگ ءِ دانا سدباب کن کوشست آک برجاءُ، ہراعلاقہ غاتے ٹی گیس انا کم پریشر ءِ ہموڑے اسہ ویل اس کم قطر نا گیس پیپ لین ہم ارے انتئے کہ دالینک ہراتم آن شاغنگاسر اوکان پد آبادی ٹی نمان ودکی مسنے، دادے بدل کننگ کن ہم گام گیج کننگ انگ ءِ۔ سے شنبے نادے قومی اسمبلی ٹی آغاحسن بلوچ، محمد ہاشم و منورہ بی بی بلوچ نا مستونگ، قلات ، نوشکی و کوئٹہ نا مضافات آتے ٹی گیس انا کم دباؤ نا بابت چکاری نوٹس نا ورندی ٹی بنجائی وزیر پٹرولیم غلام سرور خان پارے کہ گیس انا کم دباؤ نا ویل ءِ، داویل بیرہ داعلاقہ غاتے کن آخا بلکن ایلو شارتے کم ہم ارے۔ آبادی ٹی ودکی ، ہجرت تون اوار ایلو دانا سوب آک ءُ۔ گیس پیپ لین نا بدلی مفننگ نا سوب آن ویل ءِ۔ ملک اٹی گیس انا لوڈشیڈنگ اف۔ سوئی سدرن 23کلومیٹر اسکان پیپ لین 8 انچ آن ودفسا 12انچ کرینے وخت اس کہ 12انچ آن ودفسا 24انچ کرینے و گیس پیپ لین ہم شاغنگ انگ ءِ ۔ داڑان گچینی بریک و گیس انا کمتی نا ازالہ مننگ کیک۔ آغاحسن بلوچ نا سوج انا ورندی ٹی او پارے کہ 12انچ قطر نا پیپ ءِ ودفسا 24انچ کننگانے۔ اوپارے کہ گیس دُزی نا ہم پیدواری کننگانے۔ ہندی نمائندہ غاک ہم داخامی تا بایدے پیدواری ءِ کیر۔ منورہ بی بی نا سوج انا ورندی ٹی اوپارے کہ دا بدقسمتی ءِ کہ ننا ملک اٹی گیس و بجلی دُزی مریک۔ 13درسد گیس دُزی مریک ہرانا خڑچ 26ارب روپئی ءِ۔ بروک آ ہفتہ بلوچستان نا دورہ ءِ کرسا دا معاملہ ءِ وزیراعلیٰ نا نوٹس اٹ اتینہ۔ اوپارے کہ ایل پی جی مکس نوشکی ٹی ہم تسوسن داٹی ہراویل اس او ایسر کننگ انگ ءِ۔ محمود شاہ پارے کہ گیس دُزی ٹی عملہ اوار ءِ او رشوت ہلسا غیر کانودی گیس کنکشن ایترہ۔ غلام سرور خان پارے کہ یقیناًمحکمہ والاک ہم داٹی اوار مرور۔ مستونگ اسکان 16قطر نا لین شاغنگانے۔ 40 کلومیٹر پورو مسنے۔ بروک آسال دادے ودفنہ۔ مستونگ و قلات اٹی گیس انا کم پریشر نا معاملہ ایسر مریک۔ شوکت ترین پارے کہ پشاور اٹی اونا علاقہ ٹی گیس دُزی مفک ولے داڑے گیس انا کم دباؤ نا معاملہ ءِ، گیس بفک توداہم لوڈشیڈنگ اسے۔ راؤ محمد اجمل پارے کہ اِراسال آن ہراخلقت درخواست تسنو اوفتے زوت ڈیمانڈ نوٹس جاری کننگے۔
